କିଛି ସୂଚୀ

ସୀମାହୀନ ନୀଳ ନଭ ସୀମାହୀନ ଅଭିଳାଷ

ବାକି ଯା ବିଶ୍ବ ବିବିଧା, ବିଚାରେ ସୀମାର ବଶ -୦-

ଅବିଚଳ ମୃତ୍ୟୁଛନ୍ଦ ଅବିଚଳ ପରମବ୍ରହ୍ମ

ଅନ୍ୟ ଯେତେ ବିଶ୍ବଧାରା ରୁହଇ ଅନିତ୍ୟ କ୍ରମ

ଅବାରିତ ବିଭୁଇଚ୍ଛା ଆଉ ସମୟର ସୁଅ

ଲୋଭ ବିନା ଅସମ୍ଭବ ସମଗ୍ର ବିଶ୍ବ ବିକାଶ-୧-

କାମନା ବିନା ଜୀବନ ସଂସାରେ ସମ୍ଭବ ନୋହି

କାୟା ଛାୟା ସମ ଅଟେ ଜୀବନ-କାମନା ଭାଇ

ଛାଡି ଦେଉ କାରବାର ଛାଡୁ ପଛେ ଘରଦ୍ବାର

କାମନାର ଅନ୍ତ ନାହିଁ ଜଙ୍ଗଲେ କରୁ ବି ବାସ-୨-

ଭବେ ଥରେ ଜନ୍ମ ନେଲେ ମୃତ୍ୟୁ ଭେଟ ଚିର ସତ୍ୟ

ସମୟ ସୁଅ ରୋକିବ ନାହିଁ କେହି ସାମରଥ

ଅକାଟ୍ୟ ଅଲଙ୍ଘ୍ୟନୀୟ କିଛିର ଏ ସୂଚୀ ସିନା

ସତ୍ୟ ସତ୍ୟ ମିଥ୍ୟା ମିଥ୍ୟା ଭବ ଭାବେ ଚାଲେ ରାସ-୩-