କିଛି କଥା
କିଛି କଥା
କିଛି କଥା ଦୁଃଖ ଦିଏ, କିଛି ଦିଏ ଲୁହ,
କିଛି ପୁଣି ଭୁଲି ହୁଏ, କିଛି ଆଣେ କୋହ ।
କିଛି କଥା ମଜା ଲାଗେ, କିଛି ଦିଏ ହସ,
କିଛି ପୁଣି ମନେ ରହେ, କିଛି କରେ ବଶ ।
କିଛି କଥା ବୁଝି ହୁଏ, କିଛି ଖୋଜେ ବାଟ,
କିଛି କଥା କହି ଦିଏ, କିଛି କରେ ନାଟ ।
କିଛି କଥା ଭାବ ଦିଏ, କିଛି ଦିଏ ରାବ,
କିଛି ପୁଣି ରହି ଯାଏ, ହୁଏ ନାହିଁ ଶ୍ରଵ ।
କିଛି କଥା ମନ ଦିଏ, କିଛି ନିଏ ମନ,
କିଛି ପୁଣି ଭାଙ୍ଗି ଦିଏ, ଶୁଣେ ଯେବେ କର୍ଣ୍ଣ ।
କିଛି କଥା ଭଲ ଲାଗେ, କିଛି ହୁଏ ବିଷ,
କିଛି ପୁଣି ଲିଭି ଯାଏ, ହୁଏ ନାହିଁ ସ୍ପର୍ଶ ।
କିଛି କଥା ଶୁଣା ଯାଏ, କିଛି କରେ ସ୍ତବ୍ଧ,
କିଛି ପୁଣି ହଜି ଯାଏ, ହୁଏ ନାହିଁ ଲବ୍ଧ ।
କିଛି କଥା ପାଶେ ନିଏ , କିଛି କରେ ଦୂର
କିଛି ପୁଣି ବୁଝେ ନାହିଁ, କରି ଦିଏ ପର ।
କିଛି କଥା ସ୍ମୃତି ହୁଏ, କହି ହୁଏ ନାହିଁ,
କିଛି ଜନ୍ମ ନିଏ ସତ, କେହି ଜାଣେ ନାହିଁ ।
କିଛି କଥା ଘୁରି ବୁଲେ, କିଛି ହୁଏ ସ୍ଥିର,
କିଛି ପୁଣି ବଢି ଚାଲେ,ଭାଙ୍ଗେ କେତେ ଘର ।
କିଛି କଥା ଗର୍ବ ଦିଏ, କିଛି ହରେ ଧର୍ମ,
କିଛି ପୁଣି ସଙ୍ଗେ ଧରି, କରି ହୁଏ କର୍ମ ।
କିଛି କଥା ଲେଖି ହେଲେ,ହୋଇ ଯାଏ ଗଳ୍ପ,
କିଛି ପୁର୍ଣ ହୁଏ ନାହିଁ, ବାକି ରହେ ଅଳ୍ପ ।
କିଛି କଥା ଭାବରୁ ଜନ୍ମି ହୋଇଯାଏ ଏକ କବିତା,
କିଛି ବୁଝି ହେଲେ ଦିଏ ନୂଆ ଏକ ବାର୍ତ୍ତା ।
କିଛି କଥା କିଛି ମନ, ରହି ଯାଏ ଲୁଚି,
କିଛି ପୁଣି ବଞ୍ଚି ରହେ, କହେ ନାହିଁ କିଛି ।
କିଛି କଥା ଲେଖୁ ଲେଖୁ, କିଛି ଯାଏ କହି,
କିଛି ବୁଝି ପାରେ କେହି, କେହି ପାରେ ନାହିଁ ।
କିଛି କଥା ଭାଙ୍ଗେ ଜୀବନର କିଛି ମୋହ,
କିଛି କଥା ଚାପି ଧରେ ବୁକୁ, ଉଠଇ କୋହ ।
କିଛି କଥା କହିଦିଏ, କିଛି କେବେ କୁହ ନାହିଁ,
କିଛି କଥା ଭରିଦିଏ ଆଖି, କିଛି ଶୁଣେ ନାହିଁ ।
କିଛି କଥା ଅବ୍ୟକ୍ତ ହୁଏ, କିଛି ସ୍ମୃତି ହୁଏ,
କିଛି ପୁଣି ସଙ୍ଗେ ଚାଲେ, କିଛି ସାଙ୍ଗ ଛାଡିଦିଏ ।