କିଛି କିଛି ସମ୍ପର୍କର କଥା

ପର ଲୋକ ଯଦି ମଧ୍ୟସ୍ଥି ହୁଅନ୍ତି

ବାହର ଝଗଡ଼ା ମେଣ୍ଟେ କିଞ୍ଚିତେ ,

ସ୍ୱାମୀ, ସ୍ତ୍ରୀ ଙ୍କ ଝଗଡ଼ାରେ ପଶିଲେ

ସମ୍ପର୍କ ତୁଟିବ ଜାଣ ତୁରିତେ ।୧।

ସନ୍ଦେହର ଘର ଅତି ବିଷମୟ

ଧୀରେ ଧୀରେ ବିଷ ଚରେ ମନରେ ,

ଘରଠୁଁ ବାହାର ଅବିଶ୍ବାସ ଅଗ୍ନି

କୁହୁଳି କୁହୁଳି ଜଳେଇ ମାରେ ।୨।

ପ୍ରହସନ ମଧ୍ୟେ ଭକତଙ୍କ ମେଳ

ଦୁନିଆରେ ପରା ଭରି ରହିଛି ,

ଲୋକ ଦେଖାଣିଆ ଭଗବାନ ପୂଜା

ଭାଗବତ ଟୁଙ୍ଗୀ ଖାଲି ପଡ଼ିଛି ।୩।

ସମ୍ପର୍କ ମଧ୍ୟରେ ବଞ୍ଚିବାକୁ ହେଲେ

ଲୋଡ଼ା ହୁଏ ଏକ ଛୋଟ ଦୁନିଆ ,

କ୍ଷୀଣ ହୁଏ ଯେବେ ସମ୍ପର୍କର ଡୋରି

ନିଜ ଘରେ ହୁଏ ନିଜେ କୁଣିଆ ।୪।