କି ରଙ୍ଗ ବୋଳିଲୁ ?

କି ରଙ୍ଗ ବୋଳିଲୁ ମୋତେ ଲୋ ସଜନୀ

ଛାଡୁନାହିଁ ଜମା ଦେହରୁ ମୋର

ମନରେ ଏମିତି ମାଖିଛୁ ରଙ୍ଗ ତୁ

ଚୋରାଇ ନେଇଛୁ ନିଦ ମୋହର ।

ସପନେ ଦେଖୁଛି ତୋ' ସାଥେ ଖେଳୁଛି

ବୋଳିଦେଉଅଛୁ ଫଗୁ ଅବିର

ତୋ' ମିଠା ଛୁଆଁରେ ହୃଦୟ କନ୍ଦରେ

ସ୍ପନ୍ଦନ ଦ୍ୱିଗୁଣ ହୁଏ ମୋହର ।

ପ୍ରେମେ ଭିଜାଉଛୁ ମୋତେ ଲୋ ସଜନୀ

ଫଗୁଣର ଋତୁ ଲାଗେ ନିଜର

ଫୁଲର ଦେହରେ ତୋ' ଛବି ଦିଶୁଛି

ବାସ୍ନାରେ ବ୍ୟାକୁଳ ମନ ମୋହର ।

କୋକିଳ ତାନରେ ତୋ ସ୍ୱର ଶୁଭୁଛି

ମଳୟର ସ୍ପର୍ଶ କରେ ଅଧିର

ମଧୁର ଅକୁହା  ପ୍ରୀତି ଭାବାବେଗ 

ଗୀତିକା ସାଜିଛି ହୃଦେ ମୋହର ।

ମନର ରାଧିକା ତୁ ଅଭିସାରିକା

ଯଉବନ ସିକ୍ତ ପ୍ରୀତି ନିର୍ଝର

ଲୋଟିଯାଇ ବକ୍ଷେ ନାଶ କରିଦିଅ

ହୃଦୟେ ଆବଦ୍ଧ ପୀଡା ମୋହର ।