ଖୟାଲି ପଲାଉ

ବିବାହ ସାମଗ୍ରୀ ସହରରୁ କିଣି 

ଫେରୁଛି ଗାଆଁକୁ ଧଡି,

ତେଲଟିଣ ଟିଏ ବହିବା ଅଡୁଆ 

ଖୋଜି ବୁଲୁଥାଏ ଗାଡି ।

ସେହି ବାଟ ଦେଇ ଅଳସୁଆ ନଟ 

ବୁଲି ଯାଉଥିଲା କାହିଁ ,

କହିଲା ଧଡିକୁ ପାଞ୍ଚ ଟଙ୍କା ଦେଲେ 

ତେଲଟିଣ ନେବି ବୋହି ।

ନଟର ପ୍ରସ୍ତାବ ଧଡି ମାନିଗଲା 

ନଟ ମୁଣ୍ଡେ ତେଲ ଟିଣ ,

ଥୋଇ ପଛେ ଚାଲେ ଅନ୍ୟ ଜିନିଷ କୁ

ଧରି ଅତି ଯତ୍ନେ ଜାଣ ।

ନଟର ଭାବନା କାହିଁ କେତେ ଲମ୍ବା 

ୟା'ଠୁ ପାଞ୍ଚ ଟଙ୍କା ନେଇ ,

ଅଣ୍ଡାଟେ କିଣିବି ଛୁଆ ଫୁଟାଇବି 

ବଂଶ ବଢାଇବି ମୁହିଁ ।

ବହୁତ କୁକୁଡା ହେବ ଯେବେ ପାଶେ 

ବିକିବି ନେଇ ହାଟରେ ,

ଯାହା ଟଙ୍କା ହେବ ଗାଈଟେ କିଣିବି 

କ୍ଷୀର ଦୁହିଁବି ଥାଟରେ ।

ଦୁଧ ଦହି ଛେନା ବିକ୍ରି କରୁଥିବି 

ଖର୍ଚ୍ଚ କରିବିନି ମୋଟେ ,

ଘରଟେ କରିବି ବହା ସାହା ହେବି

ହୋଇବ ଆମ ପିଲାଟେ ।

ଲିପ୍ତ ଥିବି ଯେବେ ବ୍ୟବସାୟ କର୍ମେ 

ପିଲାକୁ ଧରିବା ପାଇଁ ,

କହିବ ଘରଣୀ ଅନୁନୟ ହୋଇ 

ଜମାରୁ ଶୁଣିବି ନାହିଁ ।

କହିବି ରାଗରେ ନିଜସ୍ବ ଢଙ୍ଗରେ 

ମୁଣ୍ଡକୁ ମୋର ହଲାଇ ,

ହିସାବ୍ କିତାବ୍ କର୍,ତାହୁଁ ଅବ୍

ବଚ୍ଚା ପକଡୁଙ୍ଗା ନେହିଁ ।

ଭାବି ଏହି କଥା ହଲାଏ ତା ମଥା

ମୁଣ୍ଡରୁ ଖସିଲା ଟିଣ ,

ଫାଟିଗଲା ଟିଣ ବହିଗଲା ତେଲ 

ଭାବନା ତା ଅକାରଣ ।