କହିଦେବ ସିଏ ଆଗ ଯିଏରେ

            ମାଟି ସାଥେ ହୋଇ ମାଟି

                  କିଏ ଲାଗିଥାଏ ଆନ ହିତରେ

            ମଧୁମାସ ଇଏ ବୋଲି

                  କିଏ କହିଦିଏ ମିଠା ଗୀତରେ ।

            ଶୁଖିଥିବା ନଈ,ନାଳ

                  କିଏ ଭରିଦିଏ ଗୋଳି ପାଣିରେ

            ସକାଳେ ନରମ ଖରା

                   କିଏ ଧରଣୀକି ଦିଏ ଆଣିରେ  ।

            ସଫା ଆକାଶର ଦେହେ

                   କିଏ ଇନ୍ଦ୍ରଧନୁ ଦିଏ ଆଙ୍କିରେ

            କଅଁଳା ଛୁଆକୁ ଧୀରେ

                କିଏ ନିଜ କୋଳେ ଧରେ ଜାକିରେ  ।

            ଦିନ ପରେ ରାତିଟିଏ

                 କିଏ ଆମ ପାଇଁ ଆଣେ ଏଠାରେ

            ରାତି ପରେ ଦିନ ଆଣେ

                କିଏ ସତେ ପୁଣି ଥାଏ ସେଠାରେ  ।

            ଶିଶୁ ହସେ ଖିଲି ଖିଲି

                କିଏ ସିଏ ଯେବେ ଧରେ କାଖରେ

           ଫୁଲ ଖେଳେ ଝୁଲି ଝୁଲି

                କିଏ ସିଏ ଯେବେ ଥାଏ ପାଖରେ ।

            ଦେଖିଦେଲେ ମୂଷାଟିଏ

                କିଏ ଡେଇଁପଡେ ବଡ ମଜାରେ

            ମଣିଷକୁ ଭଲ ଗୁଣ

                 କିଏ ଆଣିଦିଏ ଶହେ,ହଜାରେ ।

            ଗୀରିଷମେ ହିମ ଛାଇ

                 କିଏ ରଖିଥାଏ ଚଲା ବାଟରେ

            କରିଦେବା ଲାଗି ପାରି

                  କିଏ ଜଗିଥାଏ ନଈ ଘାଟରେ ।

            କରି ଏଇ ସବୁ କାମ

                 କରାଉଥାଏ ସେ ପୁଣି କିଏରେ

            ଦେବି ଗୋଟେ ଚକଲେଟ

                 କହିଦେବ ସିଏ ଆଗ ଯିଏରେ ।