ଖେଳିବି ପ୍ରୀତିର ହୁରି

ସ୍ମୃତି ସିଏ ମୋର ଅଜଣା ସହର

ରଙ୍ଗୀନ ଆଲୋକ ମାଳା

ପହିଲି ଦେଖାରେ କିଣି ନେଇଥିଲା

ମୋତେ'ସେ ସୁନ୍ଦରୀ ବାଳା।

ତାର ମିଠା କଥା ମନଖୋଲା ହସ

ଏବେବି ପାରୁନି ଭୁଲି

କେଜାଣି କାହିଁକି ମୋତେ ଦେଖିସିଏ

ଚାହୁଁଥିଲା ବୁଲିବୁଲି ।

ଆଖିରେ ତାହାର ଆଖି ମିଶିଗଲା

ମନରେ ମିଶିଲା ମନ

କେମିତି କହିବି କି' ସୁନ୍ଦର ଥିଲା

ଆହା'ସେ ହଜିଲା ଦିନ।

କଥା ଦେଇଗଲା ଅଗଣାରେ ମୋର

ଜାଳିବାକୁ ସଞ୍ଜବତୀ

ଅପେକ୍ଷାରେ କେତେ ଦିନ ଚାଲିଗଲା

ପାହିଗଲା କେତେ ରାତି।

ଏବେ'ବି ଚାହିଁଛି ତା' ଫେରିବା ପଥ

କାଳେ ସେ 'ଆସିବ ଫେରି

ଏଇ ଫଗୁଣରେ ତାହାରି ସାଥୀରେ

ଖେଳିବି ପ୍ରୀତିର ହୁରି ।