ଖେଳ

ଖେଳ ଅଟଇ ଉତ୍ତମ ବ୍ୟାୟାମ

ଶରୀର ବିକାଶ ପାଇଁ,

ଶରୀର ସହିତ ମନର ଦକ୍ଷତା 

ତାହା ଯୋଗୁଁ ବଢିଥାଇ ।

ପିଲାଟି ଦିନରୁ ଖେଳିବା ଅଭ୍ୟାସ

ରଖିଥିଲେ ସ୍କୁଲ ସ୍ତରେ,

ବଡ଼ ହୋଇ ଦିନେ ଦେଶ ବିଦେଶରେ

ଯାଇ ପିଲା ଖେଳିପାରେ l

ଖେଳ ଦ୍ୱାରା ବଢେ ସ୍ନେହ ସୋହାର୍ଦ୍ଦ

ପରସ୍ପର ବୁଝାମଣା,

ଦେଶ ଦେଶ ମଧ୍ୟେ ସମ୍ପର୍କ ବଢ଼ଇ

ମିଶି ଖେଳିବାରୁ ସିନା l

ମନୋରଞ୍ଜନ ଓ ଶରୀର ବ୍ୟାୟାମ

ଉଭୟ ଖେଳ ର ଯୋଗୁଁ,

ରକ୍ତ ସଞ୍ଚାଳନଦ୍ରୁତ ହେବା ଦ୍ୱାରା 

ନିରୋଗ ଜୀବନ ଭୋଗୁ l

ହକି ଖେଳ ଅଟେ ଆମ ଭାରତର

ଜାତୀୟ ଖେଳରେ ଗଣା 

ଧ୍ୟାନଚାନ୍ଦ ଆଦି ଏହି ଖେଳ ଖେଳି

ଜଗତେ ହୋଇଲେ ଚିହ୍ନା l

ଫୁଟବଲ, ଭଲି କ୍ରିକେଟଓ ହକି

ବ୍ୟାଡ଼ମିଣ୍ଟନ ଆଦି ଖେଳ,

ଦେଶ ବିଦେଶରେ ଖେଳିଥାନ୍ତି ଯାଇ

ଆମ ଭାରତୀୟ ଦଳ l

ଚେସ ଖେଳ ମଧ୍ୟ ଖେଳାଯାଇ ଥାଏ

ବସି ଗୃହ ଅଭ୍ୟନ୍ତରେ,

ବିଶ୍ଵନାଥ ଆନନ୍ଦ ନାମଟି ପ୍ରସିଦ୍ଧ 

ଦେଶ ଆଉ ବିଦେଶରେ l

ଖେଳାଳିଙ୍କୁସଦା ପ୍ରୋତ୍ସାହନ ଦେଇ

ସୁବିଧା ସୁଯୋଗ ଦେଲେ,

ଦେଶ ପାଇଁ ହେବେ ଗୌରବବର୍ଦ୍ଧକ

ନିଶ୍ଚିତ ସେ କାଳେ କାଳେ l