ଖେଳ କସରତ

ଉଚ୍ଚା ଅନୁସାରେ ରଖ ଦେହର ଓଜନ

ନିୟନ୍ତ୍ରଣେ ଗ୍ରହଣୀୟ ସୁଷମ ଭୋଜନ ,

ନିତ୍ୟକର୍ମ ସାଧନରେ ନକରିବ ହେଳା

ମଳ ପରିତ୍ୟାଗେ ଧ୍ୟାନ ରଖ ଦୁଇବେଳା ।

ଶଯ୍ୟାତ୍ୟାଗ ପରେ ଉଷ୍ଣଜଳ ବାଞ୍ଛନୀୟ

ପେଟସଫା ହୁଏ ଯହିଁ ଖାଦ୍ୟ ପାଚନୀୟ ,

ଶୁଦ୍ଧ ଅମ୍ଳଜାନ ହେତୁ ଧୀରେ ପ୍ରାଣାୟାମ

କରିବାର ପରେ ହେଉ ହାଲୁକା ବ୍ୟାୟାମ ।

ଶରୀରର ମାଂସପେଶୀ ହୁଏ ବୀକ୍ଷଣୀୟ

କଠୋର ବ୍ୟାୟାମମାନ ତେଣୁ ଶିକ୍ଷଣୀୟ ,

ନିୟମରେ ପ୍ରତିଅଙ୍ଗ କେତେ ଚାଳନୀୟ

ସେଥିପାଇଁ ନିର୍ଦ୍ଦେଶନା ନିଶ୍ଚେ ପାଳନୀୟ ।

ସାମର୍ଥ୍ୟରେ ଦେହ ପାଇଁ ଯାହା କରଣୀୟ

ସେହି ସୀମା ଅନୁସାରେ ଆଜ୍ଞା ଗ୍ରହଣୀୟ ,

ତାଲିମକୁ ମାନି କଲେ ପ୍ରଶିକ୍ଷକ ପାଶେ

ଅସମ୍ଭବ ଲାଗେ ଯାହା ସହଜରେ ଆସେ ।

ଭାର ଉତ୍ତୋଳନ ଆଦି ଖେଳ କସରତେ

ଏ' ଦେଶର ଯୁବାଗୋଷ୍ଠୀ ପ୍ରସିଦ୍ଧ ମରତେ ,

କାର୍ଯ୍ୟ କୁଶଳତା ପାଇ ଶିକ୍ଷା ନିର୍ଦ୍ଦେଶରେ

ପଦକ ଲଭିଛୁ ଆମେ ଦେଶ ବିଦେଶରେ ।