କେତେକଥା କହିବାର ଥିଲା
କେତେକଥା କହିବାର ଥିଲା
କହିବାକୁ ଥିଲା କେତେକଥା ସଖୀ
ସବୁ ରହିଗଲା ଅଧା
ଦେଖି ହେଲାନାହିଁ ଅଦେଖା ସପନ
କପାଳକୁ ଦେଲି ନିନ୍ଦା ।
ଲୋଡୁନାହିଁ ଆଉ ଫୁଲର ସହର
ଲୋଡାନାହିଁ ଜହ୍ନରାତି
ଜଳନ୍ତା ସୂରୁଜ ରଡନିଆଁ ଢାଳି
ଜାଳିଦେଉ ମୋର ଛାତି ।
ଭଲପାଇବାର ରକ୍ତିମ ଆଭାରେ
ରଙ୍ଗୀନ ମୁଁ ଯେଉଁଦିନୁ
ନିର୍ମଳ ଆକାଶ ମଳୟ ପରଶ
ଭୁଲି ଯାଇଛି ମୁଁ ମନୁ ।
ସମୟ ଖେଳୁଛି ଲୁଚକାଳି ଖେଳ
ଆଖି ମୋ ଢାଳୁଛି ଲୁହ
ତୁମେ ଖୋଲିଦେଲ ସ୍ମୃତିର ପସରା
କାହିଁକି ଲୋ ସଖୀ କୁହ ।
ଖୋଲିଲନି ଯଦି ହୃଦୟ ଦରଜା
ଖୋଲିଲନି ତୁମ ମନ
ଲୋଡିବିନି ସଖୀ କେବେହେଲେ ଥରେ
ମୋ ପ୍ରେମର ପ୍ରତିଦାନ ।
ନଦେଲେ ଦିଅ ମନ ଖୋଲା ହସ
ହୃଦୟ ନିଗିଡା ପ୍ରେମ
ଆଖିରେ ମୋ ଦିଅ ଲୋତକ ବନ୍ୟା
ପୂର୍ଣ୍ଣହେଉ ମନସ୍କାମ ।