କେମିତି ହସିବି ମୁହିଁ

କେମିତି ହସିବି ମୁହିଁ ମହାପ୍ରଭୁ

କେମିତି ହସିବି ମୁହିଁ,

ସଂସାରରେ ଏତେ ଦୁଃଖ କଷ୍ଟଦେଖି

ହସିକି ପାରିବ କେହି l

ଶିଶୁ ମାନେ ଏଠି ଯାତନା ସହନ୍ତି

କେଉଁ ବୁଦା ମୂଳେ ପଡି,

ବାଳୁତ ବେଳରେ ଭିକ୍ଷା ମାଗୁଥାନ୍ତି 

ଭୋକ ଉପାସରେ ସଢ଼ି l

ଯୁବ ପୀଢ଼ି ଆଜି ଚାକିରୀ ଖୋଜଇ 

ବାହାର ରାଇଜେ ଯାଇଁ,

ସୁଖ ଶାନ୍ତି ଆଜି ହଜିଛି ସବୁଠି

ଅଶାନ୍ତିର ଚରାଭୂଇଁ l

ବାର୍ଦ୍ଧକ୍ୟ ଅବସ୍ଥା ବେସାହାରା ଏଠି

ଛାତିରେ ଛାତିଏ କୋହ,

କିଏ ପୁଣି ଯାଇ ବୃଦ୍ଧାଶ୍ରମେ ରହି

ଆଖିରୁ ଗଡା଼ଏ ଲୁହ l

କେଉଁଠି ବରଷା ଏତେ ହେଉଥାଏ

ଫସଲ ପାଣିରେ ଲୋଟେ,

କେଉଁଠାରେ ପୁଣି ବରଷା ବିହୁନେ

ଶୁଖି କରି ମାଟି ଫାଟେ l

ବନ୍ୟା ବାତ୍ୟା ଆଉ ସୁନାମୀ ସହିତ 

ଅଜଣା କେତେ ଯେ ରୋଗ,.

ମାଡି ଆସୁଅଛି ସଂସାରକୁ ଏବେ

ନାହିଁ ପ୍ରତିକାର ଯୋଗ l

ସମାଜରେଆଜି ବଢ଼ି ଯାଉଅଛି

 ହିଂସା ଦ୍ୱେଷ କପଟତା,.

ଦେଶ ଦେଶ ମଧ୍ୟେ ଲାଗିରହିଅଛି

ଯୁଦ୍ଧର ଯେ ଘନ ଘଟା l

ଲୋକଙ୍କ ମଧ୍ୟରେ ନାହିଁ ପୂର୍ବ ପରି

ଆଉ ସେଇ ଭାଇଚାରା,

ଦୟା ଧର୍ମ ପ୍ରେମ ଲୋପ ପାଇଲାଣି

ଛଳନା ଓ ହିଂସା ଭରା l

କଳିଯୁଗର ଏଅବସ୍ଥାକୁ ଦେଖି

ହସିବେ କେମିତି କେହି,

ଆସ ଅବତରି ପ୍ରଭୁ ଲୀଳାମୟ

ଶାନ୍ତି ଦୂତ ତୁମେ ହୋଇ ll

******&*********