କବିତା
କବିତା
ଯାଯାବର ହୋଇ ଶବଦ ଗୁଡ଼ିକ
ବୁଲୁଥିଲ ତୁମେ ବାର ଦୁଆର
କବିତା ପ୍ରେମରେ ପଡ଼ିଗଲା ପରେ
ରୂପ ବଦଳାଅ ଅନେକ ଥର ।
କେବେ ରଙ୍ଗବତୀ, କେବେ ଚିତ୍ର ବତୀ
କେବେ ଅଭିମାନୀ ପ୍ରେମ ଋତୁର
ବିନ୍ଧାଣି ଲେଖନୀ ବନ୍ଧରେ ତୁମକୁ
ବାନ୍ଧିଛି ଯତନେ କରି ଆଦର ।
କେବେ ସାୟଂ କାଳ, କେବେ କୋଳାହଳ
କେବେ ଛଳ ଛଳ ଅଶ୍ରୁ ଦିଧାର
କେବେ ପତ୍ର ଦଳ କେବେ ତୁ କୋକିଳ
କେବେ କଳ କଳ ଝରଣା ନୀର ।
କେବେ ତୁ ଭକ୍ଷକ କେବେ ତୁ ରକ୍ଷକ
କେବେ କ୍ଷଣ କୋପ ତୋର
କେବେ ଦୟା କ୍ଷମା କେବେ ଦଣ୍ଡ ଅକ୍ଷ
କେବେ ମୋକ୍ଷ ଏ ଜୀବର ।
କେବେ ତୁ ଉଲ୍ଲାସ କେବେ ତୁ ବିଳାସ
କେବେ ଶଶୀ କୁମୁଦର
କେବେ ତୁ ଭ୍ରମର କେବେ ପୁଷ୍ପ ବାସ
କେବେ ମଧୁମାଳତୀର ।
କେବେ ତୁ ସପନ କେବେ ଧନ ଜନ
କେବେ ମମତାର ଧାର
କେବେ ତୁମେ ଆସି ବିରହ ବ୍ୟଥାରେ
ଢାଳ ଅମୃତର ଧାର ।