କବିତା ପର୍ବ : ପଲ୍ଲୀ ଗୀତି-କବିତା-12 : ମାଟିଘର

ମାଟିଘର ସୁଖ ପକ୍କାଘର ନାହିଁ ଜାଣିଥା' ଲୋ ନୂଆବୋହୂ,

ଚାଳରେ ମାଡ଼ିଛି ବୋଇତାଳୁ ପୋଈ ଶୋଇଛି ଢ଼ିଙ୍କିଆ ଲାଉ | (ଘୋଷା)

ଖାଲରୁ ଆଣିବି ଚିଙ୍ଗୁଡ଼ି ମାଛକୁ ମୁଁ-ବିଲରୁ କଳମ ଶାଗ,

ପୋଈନାଡ଼ି ଦେଇ ଘାଣ୍ଟ କରିଦେବୁ ହେଇଥିବ ଟିକେ ରାଗ |

ବାଡ଼ିରୁ ଆଣିବୁ କଷି କାକୁଡ଼ିଟି କାଟିଦେବୁ ଲମ୍ଵାକରି,

ଚାଳରେ ଶୁଖୁଛି କଖାରୁ ବଡ଼ି ଲୋ- ତାକୁ ଭାଜି ଦେବୁ ଚୂରି |

ଚକା ପାରିଦେଇ ବସିଗଲେ ତଳେ ଲୋଡ଼ାନାହିଁ କିଛି ଆଉ |

ମାଟିଘର ସୁଖ ପକ୍କାଘର ନାହିଁ ଜାଣିଥା' ଲୋ ନୂଆବୋହୂ |(1)

ପାଣି କଖାରୁରେ ଶାକର କରିବୁ ଦେଶୀଗୁଡ଼ ଟିକେ ଦେଇ,

କଖାରୁ ଫୁଲକୁ କଡ଼ାରେ ଭାଜିବୁ ବଟା ପିଠଉ ଗୋଳେଇ |

କଳମ ଶାଗକୁ ରସୁଣ ପକେଇ ଯତ୍ନରେ ଭାଜିଦେବୁ,

ଶେଉଳ ମାଛକୁ ଆମ୍ବୁଲ ପକେଇ ରାଗ ଝୋଳ କରୁଥିବୁ |

ବାଢ଼ିଦେବୁ ମୋତେ କହୁଥିବି ମୁହିଁ ମିଛରେ ସେତିକି ଥାଉ |(2)