କବିତା ଆଳାପ-10 : ବିଦ୍ୟାର୍ଥୀ : -ଡକ୍ଟର କୃତ୍ତିବାସ ନାୟକ
କବିତା ଆଳାପ-10 : ବିଦ୍ୟାର୍ଥୀ : -ଡକ୍ଟର କୃତ୍ତିବାସ ନାୟକ
ବିଦ୍ୟାର୍ଥୀ ଶିକ୍ଷାର୍ଥୀ ଛାତ୍ରଟିଏ ମୁହିଁ ପଢୁଛି ବୁଝି ବିଚାରି,
କେତେ ଉପଦେଶ ମାଗଣାରେ ମିଳେ କାହାକୁ ବି ନ ପଚାରି |
ବାପା ଗାଳିଦେଲେ ବୋଉ ଗାଳିଦେଲେ ଶିକ୍ଷକ ବି ଦେଲେ ଗାଳି,
ଅପଦାର୍ଥଟା ତୁ ଜୀବନ ତୋହର ହେଇଯିବ ନଈବାଲି |
ଅପଦାର୍ଥ ଶବ୍ଦ କଷ୍ଟ ଦେଲା ମୋତେ ପଦାର୍ଥ ହେବାକୁ ଚାହେ,
ସବୁଚେଷ୍ଟା କରି ବିଫଳ ହେବାରୁ ମନଟା ବିକଳ ହୁଏ |
ଦିନ ଗଡ଼ିିଚାଲେ ବୟସ ବି ବଢ଼େ ବୁଝିଲି ପଦାର୍ଥ ଗୁଣ,
ସକଳ ପଦାର୍ଥ ପ୍ରସ୍ତୁତ ହେଉଛି ହେଉ ଲୁହା କିବା ଲୁଣ |
ମଣିଷରୁ ମୁହିଁ ପଦାର୍ଥ ହୋଇଲେ ବିକ୍ରିଯୋଗ୍ୟ ହେଇଯିବି,
ଅପଦାର୍ଥ ହେଲେ ଦେବତାଙ୍କ ପରି ବଡ଼ ମଣିଷ ମୁଁ ହେବି |
ଈଶ୍ୱର ଅଦୃଶ୍ୟ ଅତନୁ ପୁରୁଷ ତେଣୁ ସିଏ ଅପଦାର୍ଥ,
ପଦାର୍ଥ ହେବିନି ଅପଦାର୍ଥ ହେବି କରି ନେଇଛି ଶପଥ |