କବି ଭାବନାରେ ଶୀତ ସକାଳ

ଲୁଚିଯାଏ ଟିକି ଫୁକିଆ ତାରାଟି

ସୂର୍ଯଙ୍କର ଆଗମନେ 

ଫିକା ଦିଶେ ଜହ୍ନ ଆକାଶ ବୁକୁରେ

ବିଷର୍ଣ୍ଣତା ଭରି ମନେ l

କଇଁ ଭିଜୁଥାଏ କାକର ଟୋପାରେ

ସତେକି ମନ ବିରହେ l

ଅନ୍ଧାର ପରଦା ଆଡେଇ ଆଡେଇ

ଶୀତୁଆ ପବନ ବହେ 

ପ୍ରକୃତି ରାଣୀ ଆଗାମୀ ଦିନର

ସ୍ୱାଗତ ରାଗିଣୀ ଗାଏ l

ପକ୍ଷୀଙ୍କ ମଧୁର ସ୍ୱନେ 

ଆବାହନ କରେ ସୂର୍ଯ୍ୟ ଦେବତାଙ୍କୁ

ପ୍ରୀତି ପଲ୍ଲବୀତ ମନେ ll

ବାରତା ଦେବାକୁ କୁଆ କୁମ୍ଭାଟୁଆ

ଖେଳାନ୍ତି ତାଙ୍କର ମଥା 

କୁକ୍କୁଟ ରାବଇ ଉଠ ହେ ଏଥର

କର କରମର ଚିନ୍ତା l

ଖାଦ୍ୟ ଚିନ୍ତା ଚମତ୍କାର 

ଦିନ ଆସିଗଲେ ଆହାର ପାଇଁ

ସବୁ ଜୀବ ତରବର l

ଉଦାସ ଉଦାସ ଲାଗଇ ସକାଳ

ନିର୍ଜନତା ସବୁ ଠାରେ  

ପ୍ରକୃତି ସତେକି ସ୍ନାହାନ କରୁଛି

କାକରର ଜଳ ଧାରେ l

ହୋଇ ସେ ପବିତ୍ର ସତେ 

ପ୍ରାଣପ୍ରିୟଙ୍କର ସ୍ୱାଗତ କରିବ

ପୁଷ୍ପାଞ୍ଜଳି ଭରି ହାତେ l

ଫୁଲ କଢି ମାନ ଅନାଇ ରହନ୍ତି

ସୂର୍ଯ୍ୟ ଆଗମନ ପାଇଁ 

ପାଖୁଡା ଉହାଡୁ କଣାଇ ଚାହାଁନ୍ତି

ସୂର୍ଯଙ୍କୁସେ ରହି ରହି l

ଅଳସେଇ ପ୍ରଜାପତି 

ପକ୍ଷ ଝାଡୁଥାଏ ପତ୍ର ପରେ ବସି

ପ୍ରେମ ଭରା ଗାଇ ଗୀତିl

କୁହୁଡି ସହିତ ସୂର୍ଯ୍ୟ ଦେବତା

ଲୁଚକାଳି ଖେଳି ଖେଳି 

ଧୀରେ ଧୀରେ ପୁଣି ଉଠି ଆସୁଥାନ୍ତି

କୁହୁଡି ପରଦା ଠେଲି l

ସକାଳ ସୂରୁଜ ଝଳି 

ରଙ୍ଗ ଖେଳିଯାଏ କାକର ବିନ୍ଦୁରେ 

କେବେ ଧଳା କେବେ ଲାଲି l

ପଲ୍ଲୀବଧୂଟି ତରତର ହୋଇ

ନଦୀର ଘାଟକୁ ଯାଏ 

ସ୍ନାହାନ ପରେ ସେ ଆଞ୍ଜୁଳା ଭରି

ସୂର୍ଯ୍ୟଙ୍କୁ ପ୍ରଣତ ହୁଏ l

ତୁଳସୀ ଚଉରା ମୂଳେ 

ପ୍ରଣତି ଢାଳଇ ଜଳଦାନକରି

ଭକ୍ତିର ଦୀପାଳି ଜାଳେ l

ଦେବାଳୟେ ପୁଣି ଘଣ୍ଟା ଘଣ୍ଟି ସ୍ଵନ

ନୀରବତା ଭଙ୍ଗ କରେ 

ମନ୍ତ୍ର ଉଚ୍ଚାରଣ ଶଙ୍ଖ ନାଦ ମିଶି

ଭକ୍ତି ଭାବ ମନେ ଭରେ l

କବିର କଳ୍ପନା ନେତ୍ର 

ସଜାଇ ଦିଏ ସେ ସକାଳ ପ୍ରକୃତି 

ଆଙ୍କି ତା ସୁନ୍ଦର ଚିତ୍ର l