କାଉ ରାବିଲେଣି କାଆ

ଉଠ ଦୁଃଖିଧନ ମୋ ନୀଳରତନ

   କାଉ ରାବିଲେଣି କାଆ l

ଉଠ ନୀଳମଣି ନେତ୍ରପ୍ରତିମା ମୋ 

  ଡାକନ୍ତି ଯଶୋଦା ମାଆ ll 

ଘଣ୍ଟ, ଘଣ୍ଟା, ଝାଞ୍ଜ ବାଜଇ ମୃଦଙ୍ଗ 

   ଉଠ ଉଠ ତେଜ ଶେଯ l

ଉଦେହେଲେ ଭାନୁ ଶୁଭେ ସିଙ୍ଗାବେଣୁ 

   ଉଠ ମୋ ନେତ୍ରପଙ୍କଜ ll

ଆରେ ବଂଶୀଧର ନ କର ଉଛୁର

  ଉଭା ତୋର ସଖାମାନେ l

ସୁଦାମ, ସୁବଳ ଡାକିଲେଣି ଆସି

   ଆସ ଯିବା ବୃନ୍ଦାବନେ ll

ଧବଳୀ ଶ୍ୟାମଳୀ ଡାକନ୍ତି ହମାଳି

   ଉଠ ମୋ ନୟନମଣି l

ବଳରାମ ଭାଇ ତରଭର ହୋଇ

   ଉଠି ପରା ବସିଲେଣି ll

ସଜେଇ ରଖିଛି ଚନ୍ଦନେ ସୁବାସ 

   ପଥୁରୀରେ ବାସ ନୀର l

ଉଠ ଉଠ ବାବୁ ମୁଖ ପଖାଳିବୁ

   ଦହି ମୁହାଁ ମୋ ଉଚ୍ଚୁର ll

ଗୋଟିକା ଅଧାମ ଖୁଆଇ ଦେବିରେ

   ଉଠ ମ

Advertisement

ୋ କଳା କହ୍ନାଇ l

ଶିରେ ବାନ୍ଧି ଦେବି ମୟୂର ଚନ୍ଦ୍ରିକା

   ନାଚୁଥିବୁ ଥେଇ ଦେଇ ll

ପୀତାମ୍ବରୀ ପାଟ କାଛ ପିନ୍ଧାଇବି 

    ସୁବର୍ଣ୍ଣ କଙ୍କଣ ବାହି l

କଟିରେ ବକୁଳ ଦାମ ଦାମୋଦର 

  ଖଟାହେଲା ମୋର ଦହି ll

ପାଦେ ଦେବି ତୋର ସୁବର୍ଣ୍ଣ ନୁପୁର 

  ହସ୍ତେ ତୋ ସୁନାବଇଁଶୀ l

ଉଠ ଉଠ ବାବୁ ମୋ କଳାବଇଁଶୀ

   ପାହିଗଲା ଏବେ ନିଶି ll

କେଡ଼େ ଭାଗ୍ୟବନ୍ତୀ ଯଶୋଦା ମାଆ

   ତୁ ଧନ୍ୟ ପୁତ୍ର ନୀଳମଣି l

ରନ୍ଧା ମାଆ ହାତ ଘିଅ ମରା ଭାତ

   ମଣୋହି ବିଶ୍ଵ ବିନ୍ଧାଣୀ ll

ନମଃ ନମଃ ପ୍ରଭୋ ଜଗତ ଠାକୁର

    ବିଚିତ୍ର ଲୀଳା ତୁମ୍ଭର l

ପ୍ରଭାତେ ପ୍ରଣତି ଘେନ ବିଶ୍ୱପତି

   ଆହେ ବିଶ୍ଵ କାରିଗର,

   ଆହେ ବିଶ୍ୱ କାରିଗର ll