କାନ୍ଦୁଛି ଲଣ୍ଠନ
କାନ୍ଦୁଛି ଲଣ୍ଠନ
ହଜି ତ ଗଲାଣି ଲଣ୍ଠନର ଜ୍ୟୋତି
ଜରାଜୀର୍ଣ୍ଣ ତା ଅବସ୍ଥା
ସିଏ ପରିତ୍ୟକ୍ତ ଅଲୋଡା ଦୁଃଖିତ
କପାଳଟା ତାର ଫଟା ।
ସେନେହ ଶରଧା ତଇଳ ସଳିତା
ତା ପାଇଁ ଏବେ ଦୁର୍ଲ୍ଲଭ
ଭାଙ୍ଗି ତ ଗଲାଣି ସ୍ୱଚ୍ଛତା ପ୍ରଚକ୍ଷୁ
ତାକୁ ହେଉନାହିଁ ଦୃଶ୍ୟ ।
ଉଜ୍ଜ୍ୱଳ ଆଲୋକ ରୂପ ଓ ରୋଷଣୀ
ଆଭିଜାତ୍ୟ ଚାକଚକ୍ୟ
ପଚାରୁଛି କିଏ ବୟସାଧିକ୍ୟଙ୍କୁ
ଅବହେଳିତ ବାର୍ଦ୍ଧକ୍ୟ ।
ଆବର୍ଜନା ପାଇଁ ଗୃହେ ନାହିଁ ବାସ
ସ୍ଥାନ ତା ଅଳିଆ ଗଦା
ଝୁରି ମରି ନିତି କାଟିବ ସେ ଦିନ
ଦୁର୍ଭାଗ୍ୟ ଅଟଇ ଜରା !
କାନ୍ଦୁଛି ଲଣ୍ଠନ କାନ୍ଦୁଛି ବିଧାତା
କାନ୍ଦୁଛନ୍ତି ବୃଦ୍ଧବୃଦ୍ଧା
ଘନ ଅନ୍ଧକାର ଏ ଅପସଂସ୍କାର
କୁଳକୁ ସଙ୍କଟ ବାଧା ।