କାମନା -------
କାମନା -------
ଚାଲି ଯାଅନା ଫଗୁଣ
ନିଃସ୍ଵ କରି ମଧୁବନ ଆଭା
ଝରି ଯାଅନା ଶେଫାଳୀ
ପର କରି ରଜନୀର ଶୋଭା
ହଜି ଯାଅନା ନୁପୁର
ଶୂନ୍ୟ କରି ପାଦ ନର୍ତ୍ତକୀର
ଲିଭି ଯାଅନା କଜଳ
ଭରି ଦେଇ ନୟନରେ ନୀର
ଝରି ଯାଅନା ବଉଳ
ଛାଡ଼ି ଦେଇ ସହକାର କର
ବୁଡ଼ି ଯାଅନା ସୂରୁଜ
ଭରି ଦେଇ ଅମା ଅନ୍ଧକାର
ଝରନା ରଜନୀଗନ୍ଧା
ରିକ୍ତ କରି ପ୍ରିୟାର କବରୀ
ଲୁଚି ଯାଅନା ସିନ୍ଦୂର
ସୀମନ୍ତକୁ ରଙ୍ଗହୀନ କରି
ରୁଷନା ମଧୁ ମଳୟ
ଶୀତଳତା ନ ଲଭୁ ବିଲୟ
ଦରଦ ନଯାଉ ହଜି
ଶୂନ୍ୟ କରି ମାନବ ହୃଦୟ