କାମନା

କାମନାକୁ ସାଥୀ କରିଣ ପ୍ରତି ମାନବ ଚଳେ

କାମନା ବିନା କି ଜିଇଁଛି କେ ମରତ ମଣ୍ଡଳେ ?

ଧନ ଜନ ଆବଶ୍ୟକତା ସୁଖେ ଜିଇଁବା ପାଇଁ

ଛଳରେ ବିଭୁଙ୍କୁ ନିବେଦେ କିଛି ଲୋଡ଼ା ମୋ' ନାହିଁ ।

କାମନା ନଥାଇ ଶରୀର ମୃତପିଣ୍ଡଟେ ସମ

ଜିଇଁବାରେ କି ସାର୍ଥକତା କିଆଁ ଜାଗଇ ଭ୍ରମ ?

କାମନା ହିଁ ଦୁଃଖ କାରଣ ଜାଣି ତାକୁ କୋଳାନ୍ତି

ସୁଖ ଦୁଃଖ ଦୁଇ ଯାଆଁଳା ଭାଇ ସମ ମିଳନ୍ତି ।

ଗୋଟିକର ବିନା ଆନର ସ୍ବରୂପଟି ଅଜଣା

କାମନା ସୂଚାଇ ଦିଅଇ ଯେଝା ଯେଝା ଠିକଣା ।

କାମନା ପଥରୁ ମିଳଇ କେତେ କେତେ ଆନନ୍ଦ

କେବେକେବେ ଗୋଟାଇଥାଏ ମନ ପରମାନନ୍ଦ ।

ଅବଶ୍ୟ କାମନା ବିନାଶେ ଦୁଃଖ ହୁଏ ବିନାଶ

ପରମଧାମାଭିମୁଖରେ ଧାଇଁ ଚାଲେ ମଣିଷ ।

ସଂସାର ପଥ ବି ନହେଲେ ତା' ନୁହେଁ କି କାମନା ?

ଯାହା ଜୀବ ପାଇଁ ନିର୍ବାଣ ପଥ ବୋଲି କଳ୍ପନା ।

ଦେହ ସୁଖ ପାଇଁ କାମନା ବିଭୁପ୍ରାପ୍ତି କାମନା

ସ୍ବରୂପ ଅଲଗା ଅଲଗା ବୋଲି ସକଳେ ଜଣା ।

ଯିଏ କାମନାକୁ ବୁଝିଛି ନିରୋଧି ନିଜ ମନ

ଈଶ୍ବରଙ୍କ ପ୍ରେମେ ରଖଇ ମତି ସଦା ତଲ୍ଲୀନ ।