କାଳିଆ ଯଦି ମୁଁ ତୋର ପୁଅ ହୁଅନ୍ତି

ସକାଳୁ ଉଠିଲେ ତୋର ପାଦ ଛୁଅନ୍ତି

ଚନ୍ଦନ ପାଣିରେ ମୁହଁ ଧୋଇ ଦିଅନ୍ତି

ଅଝଟ ହୋଇ ମୁଁ ବାଇଶି ପାହାଚେ

ଉପରୁ ତଳକୁ ଗଡ଼ି ଯାଆନ୍ତି,

କାଳିଆ ଯଦି ମୁଁ ତୋର ପୁଅ ହୁଅନ୍ତି ।

ଛପନ ଭୋଗରୁ ଟିକେ ନିତି ପାଆନ୍ତି

ରଥରେ ତୋ ସହ ମିଶି ବୁଲି ଯାଆନ୍ତି,

ଆନନ୍ଦ ବଜାରେ ଚକା ପକେଇ ମୁଁ

ଅଭଡ଼ା ଅନ୍ନ ତୋ ଖାଇ ଥାଆନ୍ତି,

କାଳିଆ ଯଦି ମୁଁ ତୋର ପୁଅ ହୁଅନ୍ତି ।

ବଡବାପାଙ୍କ ଠାରୁ ମୁଁ ପାଠ ଶିଖନ୍ତି

ଦେବଦାସୀମାନଙ୍କଠୁ ନାଟ ଶିଖନ୍ତି,

ପିଉସୀ ସହ ମୁଁ ଖେଳି ଥକିଗଲେ

ଲକ୍ଷ୍ମୀ ମାଆ କୋଳେ ଶୋଇ ଯାଆନ୍ତି,

କାଳିଆ ଯଦି ମୁଁ ତୋର ପୁଅ ହୁଅନ୍ତି ।

ଗୀତ ଗୋବିନ୍ଦରୁ ପଦେ ନିତି ଶୁଣନ୍ତି,

ତୋ ନାମକୁ ଶରଧାରେ ମନେ ଗୁଣନ୍ତି,

ଅଣସର ବେଳେ ପାଖେ ପାଖେ ରହି

ସରାଗରେ ତୋର ସେବା କରନ୍ତି,

କାଳିଆ ଯଦି ମୁଁ ତୋର ପୁଅ ହୁଅନ୍ତି ।

ପଣ୍ଡା ପଢିହାରୀ ସହ ମଜା ମାରନ୍ତି

ଦେଉଳ ବେଢାରେ ପୁଣି ଖଟି କରନ୍ତି,

ଭକତ ସାଥିରେ ମହା ଆନନ୍ଦରେ

ଭକ୍ତି ଭାବ ଦେଇ ପୂଜା କରନ୍ତି,

କାଳିଆ ଯଦି ମୁଁ ତୋର ପୁଅ ହୁଅନ୍ତି ।