କାଗଜ ଉଡାଜାହାଜ

ଉଡିଯିବି ମୁହିଁ ଦୂର ଆକାଶକୁ 

ଉଡାଜାହାଜଟେ ପରି ,

ଧରାଦେବି ନାହିଁ କେବେ ତୁମ ହାତେ 

ଉଡିବି ଆକାଶ ଚିରି ।

ମୁକ୍ତ ବିହଙ୍ଗର ସମ ଡେଣାଝାଡି 

ବୁଲିବି ମୁକ୍ତ ଗଗନେ ,

ହୃଦୟ ଖୋଲି ମୁଁ ଚିତ୍କାର କରିବି

ହସୁଥିବି ମନେ ମନେ ।

କାଗଜ ତିଆରି ଉଡାଜାହାଜ ମୁଁ 

ନୁହେଁ ମୁଁ ଯନ୍ତ୍ର ଚାଳିତ ,

ମୋ ଦେହରେ ନାହିଁ କିଛି ଯନ୍ତ୍ରପାତି 

ନୁହେଁ ମୁଁ କେବେ ବ୍ୟଥିତ ।

ସପନକୁ ମୋର ହାତେ ଧରି ନେଇ 

ଉଡିଯିବି ବହୁଦୂର ,

କେହି କେବେ ମୋତେ ଧରିପାରିବେନି

ଚାଲିଯିବି ଏତେ ଦୂର ।

ମଣିଷ ସମାଜ ବୁଝେ ନାହିଁ କେବେ 

ମୋହରି ହୃଦୟ ବ୍ୟଥା ,

କହିଦେଲି ମୁହିଁ ଅନ୍ତର ବେଦନା 

ମୋ ମନ ଗହନ କଥା ।