କାଗଜ ଡଙ୍ଗା
କାଗଜ ଡଙ୍ଗା
ରଫ୍ ଖାତାର ଫର୍ଦ୍ଦଟିଏ ସିନା
ସ୍ଵାଭିମାନୀ ଇତିହାସକୁ ଜାବୁଡ଼ି ଧରି
ଆତ୍ମହରା ହୁଏ ।
କେବେ ଓଳି ତଳୁ ବହି ଯାଉଥିବା ସୁଅରେ
କେବେ ପୁଣି ସ୍କୁଲ ବାରଣ୍ଡାର ତଳେ ତଳେ
ଦୋହଲୁ ଥାଏ ।
ଶ୍ରାବଣର ଲୁହରେ ଭିଜି ଭିଜି
ବତୁରା ଅବଶେଷେ ଟଳମଳ ଅସ୍ତିତ୍ବକୁ
ଧରି ମିଳେଇ ଯାଏ ।
ରଫ୍ ଖାତାର ଅଦରକାରୀ ପୃଷ୍ଠା ସବୁ
କାଗଜ ଡଙ୍ଗାର ନାଁ ନେଇ
ବିଭୋର ହୁଏ ।
ଚପଳାମିର ଛନ୍ଦରେ ତାଳି ମାରୁ ମାରୁ
ମୋ ଶୈଶବ ଲିଭିଯାଏ
ଆଉ କାଗଜ ଡଙ୍ଗା ସ୍ମୃତିରେ ସାଇତା ହୁଏ ।