ଭିଜାମାଟି
ଭିଜାମାଟି
ଆଷାଢ଼ ଦି ଟୋପା ଲୁହ ଢାଳିଦେଲା ବୋଲି
ତୋ ପଣତ ଓଦା ହେଲା ସିନା
ଦେଖ୍ ତୋ ଭିଜା ପଣତରେ ଧରଣୀ ରାଣୀ
ମୁହଁ ପୋଛିଲାଣି ,
ଶ୍ରାବଣର ଟୁପୁରୁ ଟାପୁରୁରେ
ତୁ ଗୋଟାପଣେ ଭିଜିଗଲୁ ସିନା
ଦେଖ୍ ତୋ ଭିଜା ବାସ୍ନାରେ ଆକାଶଟା
ବିମୋହିତ ହେଲାଣି ,
ବର୍ଷାର ମଧୁର ଛନ୍ଦମୟ ଗୀତିରେ
ତୁ ଏକାକାର ହେଲୁ ସିନା
ଦେଖ୍ କବିମାନେ ନିଜ ନିଜ କଲମରେ
ମସଗୁଲ ହେଲେଣି ,
ତୋ ଓଦା ଦେହ ଲୁଚାଇବାକୁ
ତୁ ଏତେ ବ୍ୟଗ୍ର ହେଉଛୁ ସିନା
ଦେଖ୍ ଚଷାଭାଇ ଭିଜାମାଟି ଦେଖି
ଉଛୁଳି ଉଠିଲାଣି ।।