ଜୟ ମାଆ ମଙ୍ଗଳା

ଅଭୟ ବରଦାୟିନୀ ତୁହି ମାଆ ମଙ୍ଗଳା

ଅରକ୍ଷିତର ତୁ ରଖୁ ବୁଡ଼ିବାର ଭେଳା

କେବେ ତୋର ଉଗ୍ରରୂପ କେବେ ଶାନ୍ତମୂର୍ତ୍ତି

ଭକ୍ତ ତୋ ଦର୍ଶନ ମାତ୍ରେ ପାଏ ଆତ୍ମତୃପ୍ତି

କାକଟପୁର ବାସିନୀ ପୁଣି ଗ୍ରାମେ ଗ୍ରାମେ

ଘଣ୍ଟ ଘଣ୍ଟା ଖୋଳ ତାଳେ ତୋ ଆସର ଜମେ

ଘଣ୍ଟପାଟୁଆ ବୁଲାଏ ବୈଶାଖ ଖରାରେ

ବହୁ ରୂପେ ପୂଜା ପାଉ ତୁହି ଆଶ୍ଵିନରେ

ମାଆ ଜଗଦମ୍ଵା ତୁହି ଖଣ୍ଡା ଖର୍ପର ଧରି

ଭକ୍ତ ଡାକେ ବିକଳରେ ଦୁଃଖ ନେଉ ହରି

ଦୁଇ ଭୁଜେ ବିରଜା ରୂପ ତୋର ଯାଜପୁରେ

ଚତୁର୍ଭୁଜେ ପୂଜା ପାଉ ମାଆଚଣ୍ଡୀ କଟକରେ

ଗ୍ରାମେ ଗ୍ରାମେ ତୋର ନାମ ଭଳଭଳି ଅଛି

ଏ ଅଧମ କହ କାହିଁ ବଖାଣି ପାରିଛି

ଚୈତ୍ର ଓ ଆଶ୍ଵିନରେ ତୋର ବଡ଼ ପୂଜା

ଗ୍ରାମ ନଗ୍ର ନାରୀମାନେ କରି ଉପାସନା

ପାପଖଣ୍ଡନର ପାଇଁ କରନ୍ତି ଦୟିନୀ

ଅଭୟବର ଦେଉ ରୋଗ ଦୁଃଖ ଘେନି

ଶ୍ରୀମନ୍ଦିରେ ତୋର ସ୍ଥାନ ଅନନ୍ୟ ଅଟଇ

ବିମଳାଙ୍କୁ ସମର୍ପି ପ୍ରସାଦ ମହାପ୍ରସାଦ ବୋଲାଇ

ତୋର ଆଜ୍ଞାମାଳ ଲୋଡା ଶ୍ରୀ ଚତୁର୍ଭୁଜଙ୍କୁ

ନବକଳେବର ହୁଏ ଯୋଡ଼ା ଆଷାଢକୁ

ଶଙ୍କଟହାରିଣୀ ପୁଣି ଶକ୍ତି ସ୍ଵରୂପିଣୀ

ଦୁଃଖ ନାଶକରି ତୁହି ଦୁଃଖ ବିନାଶିନୀ

ଦୁଷ୍ଟ ଜନ ଦୁଷ୍କର୍ମରୁ ନାଚେ ମହାମାରୀ

ଶିଷ୍ଟଜନ କଷ୍ଟ ପାଆନ୍ତି ଘଉଡାଅ ଅରୀ

ମାରିଲେ ମାରିବୁ ମାଆ ରଖିଲେ ରଖିବୁ

କୋଟି କୋଟି ମୁଣ୍ଡିଆରେ ଗୁହାରି କରିବୁ

ପୂଜ୍ଯା ଶିବାରାଧ୍ୟା ତୁହି ଦୁଃଖ ବିନାଶିନୀ

ଦୁଃଖ ନାଶକରି ସୁଖେ ରଖ ସର୍ବପ୍ରାଣୀ

ଦୁର୍ଗତିକୁ ନାଶ କରି ତୁ ଦୁର୍ଗତି ନାଶିନୀ

ନମସ୍ତେ ନମସ୍ତେ ମାତ ଘେନ ଆମ ଦୟିନୀ ।