ଜୟ ମା ତାରିଣୀ

ଚନ୍ଦ୍ରାଣି, ରୁଦ୍ରାଣୀ, ଶଙ୍କରୀ, ଭବାନୀ 

ଗାୟତ୍ରୀ, ସାବିତ୍ରୀ ମାଆ, 

ଏ ସାରା ସୃଷ୍ଟିର ଆଦ୍ୟାନ୍ତ କାରିଣୀ 

ମହାଗୌରୀ ପାର୍ବତୀ ମାଆ |

ନମସ୍ତେ ମାଆଲୋ ମହାକାଳେଶ୍ଵରୀ 

ମହାକାଳୀ ନମୋ ନମ, 

ନବରାତ୍ରୀ ନବଦୁର୍ଗା ମାତା ତୁମେ 

କାଳଜୟୀ ସର୍ବୋତ୍ତମ |

ମହିଷାମର୍ଦ୍ଦିନୀ ସଙ୍କଟ ହାରିଣୀ 

ଘଟଗାଁ ବାସିନୀ ମାଆ, 

ବିପତ୍ତି ବେଳରେ ସର୍ବେ ହୁଅ ସାହା 

ଜୟ ମାା ତାରିଣୀ ମାଆ|

ସଂସାର ବକ୍ଷରୁ ଦୁରେଇଦେ ପାପ 

ପୂଣ୍ୟ ଜଳ ବର୍ଷା କରି, 

ପ୍ରକୃତି,ଧରଣୀ ତୁମେ ଗୋ ଜନନୀ 

ପଣତେ ନିଅ ଆବୋରି |

ବିନାଶ ବେଳରେ ସୃଷ୍ଟି ରକ୍ଷା କର 

ହାହାକାର ବିଶ୍ଵବାସୀ, 

ଧରି ବିଶ୍ୱରୂପ ଉଗ୍ରଚଣ୍ଡୀ ରୂପ 

ଭଦ୍ରକାଳୀ ରୂପେ ଆସି |

ସାଥେ ଧରି ଆସ ଭୂତ, ପ୍ରେତ ଗଣ 

ପାପୀକୁ ଦିଅ ବିଦାରୀ, 

ନରମୁଣ୍ଡ ମାଳି ମାଗୋ ଭଦ୍ରକାଳୀ 

ଦୂରଯାଉ ମହାମାରୀ |

ମାଗୋ ସନାତନି ମା ବିଶ୍ୱ ମୋହିନୀ 

ଚୌଷଠି ଯୋଗିନୀ ମା, 

ସଙ୍କଟ ବେଳରେ ଆକୁଳେ ଡାକୁଛି 

ମାଆ ହୁଅ ବାରେ ସାହା |

ଅଜ୍ଞାନୀ ଜନ ମୁଁ ଦୋଷ କର କ୍ଷମା 

ଚରଣେ ଦିଅ ଆଶ୍ରୟ, 

ଶାନ୍ତରୂପେ ପୁଣି ଦିଅ ଦରଶନ 

ମନୁ ଦୂରହେଉ ଭୟ |

ଆଦିଶକ୍ତି ଆଦିମାତା ନମସ୍ତୁତେ 

ସକଳ ସୃଷ୍ଟି ଆଧାର, 

ହୃଦୟର ଭକ୍ତି,ଭାବ ସମର୍ପଣ 

କରୁଛି ମା ରକ୍ଷାକର |