ଜୟ ଜଗତ ଠାକୁର

ଜୟ ଜଗତ ଠାକୁର ନୀଳଗିରି ପତି l

ଶରଣ ରକ୍ଷଣ ନାଥ ଅଗତିର ଗତି ll

ପଞ୍ଚୁକୋଶ କ୍ଷେତ୍ରବର ପୂର୍ବ ସିନ୍ଧୁ ତୀରେ l

ଦାରୁବ୍ରହ୍ମ ମୂର୍ତ୍ତି ବିଜେ ଦିବ୍ୟ ମନ୍ଦିରରେ ll

ଗତି ମୁକ୍ତି ଲଭେ ପ୍ରାଣୀ ଯା ଦର୍ଶନ କରି l

ଶରଣ ରକ୍ଷ ବସିଛି ବାହୁକୁ ବିସ୍ତାରି ll

ନୀଳାମ୍ବର କଟି ଦେଶେ ରେବତୀର ପତି l

କୋଟି ସିଂହ ପରାକ୍ରମ ଧବଳ ମୂରତି ll

କାଦମ୍ବରୀ ପାନରେ ରକ୍ତିମ ମତ୍ତ ଡୋଳା l

ଯୋଗେଶ୍ୱର ନାଥ ପ୍ରଭୁ ଭକ୍ତ ଭାବ ଭୋଳା ll

ଦୁଇ ଭାଉ ମଧ୍ୟେ ବିଜେ ସୁଭଦ୍ରା ଭଉଣୀ l

ହଳଦିଆ ମୁଖି ଆଦ୍ୟାଶକ୍ତି ଠାକୁରାଣୀ ll

ବାମ ପାରୁଶେ ଶୋଭନ୍ତି ଚକ୍ର ସୁଦର୍ଶନ l

ପ୍ରଭୁଙ୍କ ଆୟୁଧ କାଳ ନକ୍ର ବିନାଶନ ll

ନୀଳଚକ୍ରେ ନେତ ଉଡ଼େ ପତିତପାବନ l

ଦର୍ଶନେ ଭକ୍ତ କରଇ ଆନନ୍ଦେ ନର୍ତ୍ତନ ll

ସତ୍ୟରେ ବାମନ ପ୍ରଭୁ ରାମ ତ୍ରେତୟାରେ l

ଦ୍ଵାପରେ କଂସ ବଧିଲେ କୃଷ୍ଣ ଗୋପପୁରେ ll

କଳିଯୁଗେ ଜଗନ୍ନାଥ ନୀଳାଚଳେ ଲୀଳା l

ରତ୍ନବେଦୀ ତଳେ ଲକ୍ଷେ ଶାଳଗ୍ରାମ ଶିଳା ll

ନମସ୍ତେ ନମସ୍ତେ ଆହେ ଚତୁର୍ଦ୍ଧା ମୂରତି l

ରୂପ ତୁମ୍ଭ ସଦା କରୁ ମୋ ନେତ୍ର ବସତି ll