ଜୟ ଜଗନ୍ନାଥ
ଜୟ ଜଗନ୍ନାଥ
ଜୟ ଜଗନ୍ନାଥ ଜଗତ ଈଶ୍ୱର
କରେ କୋଟି ଦଣ୍ଡବତ
ପୁରୁଷ ଉତ୍ତମ କୋଟି ସୂର୍ଯ୍ୟ ସମ
ହୁଅ ପ୍ରଭୁ ପ୍ରତିଭାତ ।
ନାଶ ରୋଗ ଦୁଃଖ ଅଜ୍ଞାନ ଅନ୍ଧାର
ଧ୍ୟାନକୁ କର ପ୍ରେରିତ
ଜୀବନରେ ଭରୁ ପ୍ରକୃତି ପ୍ରଶାନ୍ତି
ଅମୃତ ପ୍ରାଣ ଉଚ୍ଛ୍ୱାସ ।
ଦେବତା ସମାନ ମାତା ପିତା ଗୁରୁ
ସମ୍ମାନେ ହୁଏ ମୁଁ ଧନ୍ୟ
ଦିଅ ଆତ୍ମଶକ୍ତି ଭକ୍ତି ସଦ୍ଭାବନା
ମନୋଭାବ ସମର୍ପଣ ।
ସାମାଜିକ ସ୍ତରେ ରହୁ ସୁସମ୍ପର୍କ
ସ୍ନେହ ପ୍ରେମ ମୈତ୍ରୀ ଭାବ
ଆତ୍ମୀୟ ସ୍ୱଜନ ବନ୍ଧୁତା ସମ୍ବନ୍ଧ
ରହୁ ଅତୁଟ ସଦୈବ ।
ମନରେ ଆସୁ ମୋ ବିଶୁଦ୍ଧ ଭାବନା
କର୍ତ୍ତବ୍ୟ କରମ ନିଷ୍ଠା
ପର ଉପକାର ସେବା ପରାୟଣେ
ନ ଆସୁ ମନରେ କୁଣ୍ଠା ।
ପତିତମାନଙ୍କୁ ଉଦ୍ଧରିବା ପାଇଁ
ଉଡେ ପତିତପାବନ
ତୁମେ ଗତି ମୁକ୍ତି ପରମ ଆରାଧ୍ୟ
ଦିଅ ସଦବୁଦ୍ଧି ଜ୍ଞାନ ।