ଜୟ ଜଗନ୍ନାଥ
ଜୟ ଜଗନ୍ନାଥ
ଆହେ ଜଗନ୍ନାଥ ଦୁଃଖି ଦୁଖ ହାରୀ
ଦୀନବନ୍ଧୁ ଭକ୍ତ ବତ୍ସଳ
ମହୋଦଧୀ ତୀରେ ରତନ ବେଦୀରେ
ଉପବିଷ୍ଟ ଜଗତ ପାଳ||
ବାରମାସେ ତେର ଯାତରା ରଚିଣ
ଭକତଙ୍କୁ ଭାବ ବିହ୍ବଳ
ବିଭୁ ପ୍ରେମ ସ୍ରୋତେ ଭସାଇ ରସାଇ
ଲଗାନ୍ତି ଗହଳ ଚହଳ||
ପେଟ ପୁରେ ନାହିଁ ବୋଲି କହି ସିଏ
ଷାଠିଏ ପଉଟି ରାନ୍ଧି
ଅବଢା ରୂପରେ ଭକତେ ଖୁଆନ୍ତି
ଭାବର ଡୋରୀରେ ବାନ୍ଧି||
ମହୋଦଧି ଦୂରୁ ବହି ଆଣୁଥାଏ
ସୁଶିତଳ ସେ ସମୀରଣ
ନୀଳଚକ୍ର ଦେହେ ହାତ ଠାରି ଡାକେ
ତା ବାନା ପତିତ ପାବନ||
କଳ୍ପ ବଟ ଠାରୁ ମହୋଦଧି ଯାଏ
ସ୍ଥାନ ଅଟେ ଅନ୍ତର୍ବେଦୀ
ଯେଉଁ ସ୍ଥାନେ ନର ମରଣ ଲଭିଲେ
ଯମ ପାରେନି ଜମା ବାନ୍ଧି||
ଅନ୍ତର୍ବେଦୀ ଦେହେ ତେଜି ଶେଷ ଶ୍ବାସ
ସ୍ବର୍ଗଦ୍ବାରେ ଲୀନ ହୋଇଲେ
ମୋକ୍ଷ ଲଭି ନର ଜନ୍ମ ମୃତ୍ୟୁ ଚକ୍ରୁ
ମୁକତି ଲଭଇ ସେ ଭଲେ ||
ଆଦ୍ୟ ଅବତାର ମତ୍ସ୍ୟ ଅବତାର
ତା ମହୋଦଧିରେ ନେଇଣ
ଆରତ ତାରଣ ଧର୍ମ ସଂସ୍ଥାପନ
କରିଥିଲେ ବିଷ୍ଣୁ ମୋହନ||
ତା ଦେଉଳ ଅଟେ ବଡ ଦେଉଳ ଯେ
ଦାଣ୍ଡ ତାହାର ବଡ ଦାଣ୍ଡ
ସୁନାର ଗୌରାଙ୍ଗ ପ୍ରଭୁ ଲୋକନାଥ
ନୀଳାଚଳୁ ବିଶ୍ବ ବ୍ରହ୍ମାଣ୍ଡ ||
ବିଶ୍ବ ମାନଚିତ୍ର ରଚଇ ଶ୍ରୀକ୍ଷେତ୍ର
ମହିମା ମୟ ଜଗନ୍ନାଥ
ଚଉଦ ଭୁବନ ପାଳନ କରଇ
ତା ପାଦେ କୋଟି ପ୍ରଣିପାତ||