ଜୟ ଜଗନ୍ନାଥ ସ୍ୱାମୀ

ହାତନାହିଁ ତୋର ମହାବାହୁ ବୋଲି

ସରବେ କୁହନ୍ତି ତୋତେ

ପାଦନାହିଁ ତୋର ପଦ୍ମପାଦ ବୋଲି

ନାମ ବହିଛୁ ମରତେ I

କେତେବଡ ତୋର ପେଟରେ କାଳିଆ

ଷାଠିଏ ପଉଟି ଖାଉ

ଦେବଦାସୀ ନୃତ୍ୟ ଦେଖି ଦେଖି ନିତି

ରତ୍ନ ପଲଙ୍କରେ ଶୋଉ I

ଛପନ ଭୋଗରେ ଶରଧା ତୋହର

ତୋ ଚଳଣି ରାଜାପରି

ତଥାପି ଆତ୍ମୀୟ ପଣ ଦେଖାଇ ତୁ

ଦୁଃଖୀ ଦୁଃଖ ନେଉ ହରି I

ତୋ ଦରବାରରେ ଧନୀ ଦରିଦ୍ରର

ଭେଦଭାବ ନାହିଁ କିଛି

ତୋ ମହାପ୍ରସାଦ ବ୍ରାହ୍ମଣ ଚାଣ୍ଡାଳ

ଖାଆନ୍ତି ଭୂଇଁରେ ବସି I

ଏତେ ବଡ ବଡ ତୋ ଚକାଆଖିରୁ

ନିରନ୍ତର କୃପା ଝରେ

ତୋ କରୁଣା ପ୍ରାପ୍ତ ହୋଇଯାଏ ଟିକେ

ଡାକିଦେଲେ ଭକ୍ତିଭରେ I

କଳିର ଦେବତା କାଳିଆ ରାଜା ତୁ

ଏହିଭଳି ଚାହିଁଥିବୁ

ତୋ ଦର୍ଶନ ଟିକେ ଦେଉଥିବୁ ଜଗା

ହୃଦୟରେ ରହିଥିବୁ I