ଜୋକର୍
ଜୋକର୍
ହେବ କି ହାଜର ଡେଇଁ ସମାଜର
ଅଦୃଶ୍ୟ ଲକ୍ଷ୍ମଣରେଖା
ପାର୍ବଣ ବେଳାରେ ଦଶ'ରା ମେଳାରେ
ହୁଅନ୍ତା ଟିକିଏ ଦେଖା ।
ପ୍ରତିବନ୍ଧ ସତ୍ତ୍ଵେ ଏହିଥର ସତେ
ଆସିବ କି ତାଙ୍କ ସାଥେ
ନହେବ ବ୍ୟଥିତ ଥିବି ଉପସ୍ଥିତ
ଲମ୍ବା ଟୋପି ପିନ୍ଧି ମାଥେ ।
ହେବନି ଚକିତ ବିଚିତ୍ର ଅଙ୍କିତ
ହାସ୍ୟ ଅଭିନେତା ସାଜି
ସର୍କସ୍ ଭିତରେ କୌତୁକ ବିତରେ
ଅସ୍ତିତ୍ବ ଲୁଚାଇ ଆଜି ।
ଚାରିଆଡ଼େ ବୁଲି ପାରିନି ତ ଭୁଲି
ଦେଖିବାକୁ ଥରେ ଆସ
ଜାଣିଛି ସ୍ବଚ୍ଛଳେ ଏବେ ଏ' ଅଞ୍ଚଳେ
କରୁଅଛ ବୋଲି ବାସ ।
ନିଜକୁ ହିଁ ଜାଳି ଖେଳେ ଲୁଚକାଳି
ମୁହଁ ସାରା ରଙ୍ଗ ମାଖି
ପରିଚୟ ଜାଣି ଦେଖି ଏହି ଠାଣି
ଝୁଙ୍କାଇ ଦେବନି ଆଖି ।
ହସୁଥାଏ ମୁହଁ ପିଇ ପିଇ ଲୁହ
ଅନ୍ତରେ ସିନା ମୁଁ ଭରି
ତୁମ ଏ' ଅଞ୍ଚଳ ଛାଡିବି ଚଞ୍ଚଳ
କାର୍ଯ୍ୟକ୍ରମ ଗଲେ ସରି ।
କେତେ ମୁଁ ଜର୍ଜର ଦେଖିବ ନଜର
ବଞ୍ଚାଇ ଦୂରରୁ ଥରେ
ଏହାଛଡ଼ା କିଛି ରଖିନାହିଁ ଇଚ୍ଛି
ଭାବିବନି ନିରାଦରେ ।
ଦେଉଅଛି କଥା ହେଉ ପଛେ ବ୍ୟଥା
ରହିବି ସ୍ମୃତିରେ ଦହି
ତୁମେ ମଧ୍ୟ ପରେ ଫେରିଯିବ ଘରେ
ବିଦାୟ ନେବ ଗୋ ସହୀ ।