ଜଣାନାହିଁ

ଦଶ ଅବତାର ଜାଣିନାହିଁ ପ୍ରଭୁ

  ଜାଣିଛି ଖାଲି ତୁମକୁ

କେଉଁ ନାମଧରି ଡାକିବି ତୁମକୁ

  ପଚାରେ ନିଜମନକୁ ।

 କେଉଁ ଫୁଲଟିରେ ଶରଧା ତୁମର

  ସେ କଥା ତ ଜଣା ନାହିଁ

 କହିଦିଅ ପ୍ରଭୁ କେଉଁ ଫୁଲଟିଏ

    ଆଣିବି ମୁଁ ତୁମପାଇଁ ।

  ଜଣାନାହିଁ ପ୍ରଭୁ କେଉଁ ଦରବରେ

     ଶରଧା ତୁମର ଅଛି

   ତୁମେ କହିଦେଲେ ସେସବୁ ଦରବ

     ଆଣିବି ମୁଁ ବାଛି ବାଛି ।

   ସୁଗନ୍ଧ ଚନ୍ଦନ, ପାଟ ପିତାମ୍ବରୀ,

      ମୟୂରୀ ଚନ୍ଦ୍ରିକା ଦେଇ

   ମୋ ଅଗଣାରୁ ଆଣିଛି ତୁଳସୀ

     କେବଳ ତୁମରି ପାଇଁ ।

   ଜାଣେନାହିଁ ଜପ ଜାଣେନାହିଁ ତପ

      କେବଳ ତୁମକୁ ଜାଣେ

    ତୁମରି ପୂଜାରେ ନିତିଦିନ ପ୍ରଭୁ

      ହୃଦୟରୁ ଦୀପ ଜାଳେ ।