ଜଣାନାହିଁ ସେ କିଏ

ଜାଣିନି କିଏସେ କାହାର ଆଖିରେ

ବୁଣୁଥିଲା ସ୍ୱପ୍ନ ମଞ୍ଜି

କା ମନ ଆକାଶେ କିଏସେ କେଜାଣି

ଜହ୍ନ ଦେଇଥିଲା ଖଞ୍ଜି I

ଜୋଛନା ନଈରେ ଭିଜାଉଥିଲା କେ

ହୃଦୟକୁ ପ୍ରତିକ୍ଷଣ

ମୃଦୁ ସୁମଧୁର ଛଳନାରେ କିଏ

ମୋହୁଥିଲା କାର ମନ I

କାହା ଆଖିତଳେ ତାରାଫୁଲ ସବୁ

ଫୁଟୁଥିଲେ ଗୋଟି ଗୋଟି

କାହାର କଣ୍ଠରୁ ଝରୁଥିଲା ସଦା

ପ୍ରଣୟ ମଧୁର ଗୀତି I

ସପନ ବିଭୋର ମନତଳେ କିଏ

ଜାଳିଥିଲା ଦୀପ ଶିଖା

କାହା ମୁଖେ କିଏ କେଉଁଦିନ କୁହ

ଭରି ଦେଇଥିଲା ଭାଷା I

ଇତିହାସ ହେଲା କାହିଁକି କେଜାଣି

ପ୍ରଣୟ ମଧୁର ସ୍ୱର

ଆଖିରୁ ହଜିଲା ସପନ କାହିଁକି

ଝରିଲା ଲୋତକ ଧାର I