ଜନ୍ମଦିନ

ମନେପଡେ ମୋର        ପିଲାଦିନ କଥା

     ଯେବେ ଆସେ ଜନ୍ମଦିନ

ନୂଆ ବସ୍ତ୍ର ପିନ୍ଧି      ବୋଉ ସାଥେ କରେ

     ମନ୍ଦିରେ  ଦିଅଁ ଦର୍ଶନ ||

ସନ୍ଧ୍ୟାବେଳେ      ଘରେ ସଭିଙ୍କର ମେଳ

     ସତ୍ୟନାରାୟଣ ପୂଜା

ବୋଉ ହାତ ରନ୍ଧା       ପୁରି ତରକାରି

     ସାଥିମେଳେ ଖିଆ ମଜା ||

ଆଜି କାଲି କିନ୍ତୁ       ବଦଳି ଗଲାଣି

        ଜନ୍ମଦିନ ସାଜସଜା

କେକ୍ ନ କାଟିଲେ     କ୍ରିମ୍ ନ ନେସିଲେ

      ମିଳେ ନାହିଁ କାଳେ ମଜା ||

ରଙ୍ଗ ବେରଙ୍ଗର     ବେଲୁନ୍ ସହିତ

      ରଙ୍ଗୀନ କାଗଜ ସଜା

ସୁନ୍ଦର  ରଙ୍ଗୀନ    ମହମ ବତୀକୁ  

      ଫୁଙ୍କି ଲିଭାଇବା ମଜା ||

ସଭିଏଁ ଗାଆନ୍ତି        ସମବେତ ସୁରେ  

       ହାପି ବାର୍ଥଡେ ସଂଗୀତ

କେକ୍ କୁ ଖାଆନ୍ତି       ଉପହାର ଦେଇ

       ନାଚନ୍ତି ସାଥି ସଙ୍ଗାତ ||

ଜନମ  ଦିନର         ପାଳନ ହେଲାଣି

       ଏବେକାର ଏକ ଫେସନ

ମଦ ମାଂସ ସାଥେ        ନୃତ୍ୟର ଆସର

       ନାନା ସୁସ୍ବାଦୁ ବ୍ୟଞ୍ଜନ ||

ସ୍ବାର୍ଥପର ଜଗି    ବସିଥାଏ କେବେ

      ଆସିବ ସତେ ଏଦିନ

ଫୁଲତୋଡା ସାଥେ    ଉପହାର ଦେଇ

       ତୋଷି ପାରିବ ସେ ମନ ||

ମିଛରେ ବାକ୍ୟର      ଚାତୁରୀ ବଳରେ

      ବୋଲାଇବ ଅତି ନିଜର

ବେଳକାଳ ଦେଖି      ହାସଲ କରିବ

      ନିଜ ସ୍ବାର୍ଥ ସ୍ବାର୍ଥପର ||

ଜନମ ଦିବସ      ଗୁରୁତ୍ବ ରଖଇ

    ପ୍ରତ୍ୟେକର ଜୀବନର

ମଧୁର ମିଳନ     ମୁହୂର୍ତ୍ତଟେ ଏହା

   ଆଶିର୍ବାଦ ଲଭିବାର ||

ଜନମ ଦିବସ     ଅଟଇ ଜୀବନେ

    ଏମିତିକା ଏକ ଦିନ

ହିସାବ ନିକାଶ    କରିବାର ବେଳ

    କୃତ କର୍ମ ମୂଲ୍ୟାୟନ ||

ଏହି ଦିନ ଅଟେ    ସଂକଳ୍ପ ନେବାର

     ଆଗାମୀ ସମୟ ପାଇଁ

ଉତ୍ତମ କରମ      କରିବାକୁ ହେବ

     ଉତ୍ତମ ପଥରେ ରହି ||