ଜଳୁଛି ଏ ମଞ୍ଚ
ଜଳୁଛି ଏ ମଞ୍ଚ
ନୃତ୍ୟ ରତା ନର୍ତ୍ତକୀ ଓ
ରୂପସୀ ନାୟିକା
ଖଳ ନାୟକର ସାଥେ
ହାସ୍ୟ ଅଭିନେତା ।
କେତେ ଦ୍ରୌପଦୀର ଚୁଟି
କିଏ ନିଏ ଟାଣି
କେତେ କୁରୁ ସଭାଏଠି
ନ ହୁଏ ଯେ ଗଣି ।
ଜରାଶ୍ରମେ ବୃଦ୍ଧା ବୃଦ୍ଧ
ପ୍ରତୀକ୍ଷାର ଅନ୍ତେ
ଯୌତୁକ ଜୁଇରେ ଜଳେ
ନବ ବଧୁ କେତେ ।
ରାତାରାତି କୋଟି ପତି
ରାଜନେତା ମନ୍ତ୍ରୀ
ଗରିବ ପିଠି ରେ ଏଠି
ବାଜେ ନିତି ଲାଠି ।
କେତେ ଦକ୍ଷ ଅଭିନେତା
ଆଜିର ମଞ୍ଚରେ
ଧର୍ମ କାନ୍ଦେ ପର୍ଦ୍ଦା ପଛେ
ଅଧର୍ମ ହସେରେ ।
ପାଚେରୀକୁ ଡେଇଁ ଯାଇ
ଦୂର୍ବୁତ୍ତ ଚଂପଟ
ନ୍ୟାୟ ପାଇବା ଆଶେ
ପୀଡ଼ିତା ଛଟପଟ ।
ବିଳମ୍ବିତ ନ୍ୟାୟ ପାଇଁ
ଆତ୍ମହତ୍ୟା କଲା
ତଥାପି ଜଳୁଛି ମଞ୍ଚ
ପ୍ରଶାସନ ଢିଲା ।
ମଞ୍ଚ ସାଜସଜ୍ଜା ପୁଣି
ନାଟ୍ୟ ନିର୍ଦ୍ଦେଶକ
ତାର ଦକ୍ଷ ନିର୍ଦ୍ଦେଶରେ
ଜଳୁଛି ଏ ମଞ୍ଚ।
ଯା'ର ଅଭିନୟ ସରେ
ନିଏ ସେ ବିଦାୟ
ଯବନିକାର ପତନ
ତା ପାଇଁ ନିଶ୍ଚୟ।
ତଥାପି ସେ ନିର୍ଦ୍ଦେଶନା
ଜାରି ରହିଅଛି
ନିଖୁଣ ନାଟ୍ୟକାର ଟି ସେ
ମଞ୍ଚ ସଜାଡୁଛି ।
ମଞ୍ଚ ର ସାଜସଜ୍ଜା ସତେ
କି ଚିତ୍ତାକର୍ଷକ
ଅବ୍ୟର୍ଥ ବିନ୍ଧାଣୀ ସିଏ
ଜଳୁଛି ଏ ମଞ୍ଚ ।
ସଜା ଡୁଚି ଆଲୋକ ସେ
କେଡେ ଦୀପ୍ତିମନ୍ତ
ତାରକା ଚନ୍ଦ୍ରମା ସହ
ଏକଇ ଆଦିତ୍ୟ ।
ସବୁଜ ବନାନୀ ସହ
ପକ୍ଷୀ କଳରବ
ବାଦ୍ୟ ନୃତ୍ୟେ ସଜାଡ଼ିଲା
ଜଳୁଛି ଏ ମଞ୍ଚ।।