ଜଳବନ୍ଦୀ
ଜଳବନ୍ଦୀ
ଅଜ୍ଞାନ ମଣିଷ କରେ ଅବିଚାର
ନିଜର ପ୍ରଗତି ପାଇଁ
ପ୍ରକୃତି ସୁରକ୍ଷା ବିପନ୍ନ କରୁଛି
ସେଥିପ୍ରତି ନିଘା ନାହିଁ ।
କୋପରେ ପ୍ରକୃତି ଜଳି ଦେଖାଉଛି
ତା'ର ଭୟଙ୍କର ରୁପ
ପୃଥିବୀ ପୃଷ୍ଠରେ ସନ୍ତୁଳନ ପରା
ହେଉଅଛି ଆଜି ଲୋପ ।
ବନ୍ୟା,ବାତ୍ୟା ,ଝଡ଼ ,ତୋଫାନ ସାଙ୍ଗକୁ
ମରୁଡି ଯେ ଦୁର୍ବିପାକ
ଦେଖାଉଛି ଠାଣି ଦିନ ଅଦିନରେ
ଭରୁଅଛି ହୃଦେ ଦୁଃଖ ।
ମଉସୁମୀ ବର୍ଷା ଅନିୟମିତରେ
ବରଷି ଧରଣୀ କୋଳେ
ନଦୀ ନାଳ କୂଅ ପୋଖରୀର ଗର୍ଭ
ଫୁଲିଉଠେ ବର୍ଷାବେଳେ ।
ମଣିଷ କରମ ବଳେ ନଦୀହ୍ରଦ
ଶଯ୍ୟା ପୋତିହୋଇଯାଇ
ବନ୍ୟା ବିଭୀଷିକା ସାଜୁଅଛି ଦାଉ
ମଣିଷର ରକ୍ଷା ନାହିଁ ।
କେତେ ଯେ ଦୁର୍ଦ୍ଦଶା ଭୋଗୁଛନ୍ତି କିଏ
ଜଳବନ୍ଦୀ ହୋଇ ଏଠି
ଅନୁଭବୀ କଷ୍ଟ ଜାଣିବ ବା କିଏ
ସୁଖ ତା'ର ନିଏ ଲୁଟି ।
ଖାଇବା,ପିଇବା,ବସିବା ,ଶୋଇବା
ଅସୁବିଧା ହୁଏ କେତେ
ଭୋକ ଉପାସରେ ଚାହିଁଥାନ୍ତି ମୁକ୍ତି
ଜଳବନ୍ଦୀ ଲୋକ ଯେତେ ।
ବିଷଧର ଜୀଵ ଜନ୍ତୁଙ୍କର ଭୟ
ମନରେ ଆଶଙ୍କା ଭରେ
ବିପଦ ଭିତରେ ମଣିଷ ଜୀବନ
ସୁଖୀ କିବା ହୋଇପାରେ ?
ବରଷ ଯାକର ଆଶ୍ରା ଚାଷକ୍ଷେତ
ଜଳବନ୍ଦୀ ହୋଇ ନଷ୍ଟ
ଚିନ୍ତାଗ୍ରସ୍ତ ଚାଷୀ ପରିବାର ଜନ
ରହିବେ ଭୋକିଲା ପେଟ ।
ଜଳରେ ବୁଡଇ ସାଇତା ସମ୍ପଦ
ଘରଦ୍ୱାର ହୁଏ ମାଟି
ମୁଣ୍ଡ ଗୁଞ୍ଜିବାକୁ ଆଶ୍ରା ଖୋଜେ କିଏ
ଛାତି ଯାଏ ତା'ର ଫାଟି ।
ଆଖିରେ ଦେଖିଲେ ଜଳବନ୍ଦୀଙ୍କର
ଶୋଚନୀୟ ଦୁରବସ୍ଥା
ଦରଦୀ ମଣିଷ ହୃଦ କାନ୍ଦିଉଠେ
ମନରେ ଭରଇ ବ୍ୟଥା ।
ବେଳ ଆସିଅଛି ହୋଇବା ସଜାଗ
ସରକାର ଓ ଜନତା
ନଦୀ ହ୍ରଦ ଶଯ୍ୟା ପୋତି ହେବନାହିଁ
କରିବା ସୁଦୃଢ଼ ବ୍ୟବସ୍ଥା ।