ଜୀବନ୍ତ ପାଷାଣ

ଜରା ଜର୍ଜର ଜୀର୍ଣ୍ଣ ତୁମେ ଆଜି

ତଥାପି ଦାମ୍ଭିକ ହୃଦୟେ ତୁମର

ଐତିହ୍ଯ ସବୁ ଜୀବିତ ହୋଇ ରହିଛି ।

ପ୍ରତିଟି ଗାତ୍ରେ ପ୍ରତିଟି ଅନୁକୋଣେ

ଗୌରବ ଗାଥା ଆଜି ବି ଉଦ୍ଭାସିତ ହେଉଛି । ।

ଦେବତା ବିନା ଶୂନ୍ଯ ମନ୍ଦିରେ

ଦେବାଶିଷ ସଦା ଝରୁଛି

ବାର 'ଶ ଶିଳ୍ପୀର ନିହଣ ମୁନେ

ଖୋଦେଇ ସ୍ବର ଆଜି ବି ଶୁଭୁଛି

ବାର ବର୍ଷର କିଶୋରର ଦୃଢ ଶପଥ

ଆଜି ବି ହୃଦୟେ କଂପନ ଆଣୁଛି । ।

ନାଟ ମନ୍ଦିର ମୁଖଶାଳା ର ପ୍ରତିଟି ଶିଳା

ତୁମରି କାହାଣୀ କହୁଛି

ଧର୍ମପଦ ର ତ୍ଯାଗ ବଳିଦାନ କଥା

ସଭିଁଙ୍କ ହୃଦୟେ ଲିପିବଦ୍ଧ ହୋଇ ରହିଛି

ଚନ୍ଦ୍ରଭାଗା ବି ଏ ଯାବତ୍ ତୁମରି

କାହାଣୀର ସାକ୍ଷୀ ହୋଇ ରହିଛି ।

କିଏ ବା କହିବ ହେ କୋଣାର୍କ ତୁମକୁ ସତେ

ଜରା ଜୀର୍ଣ୍ଣ ଜର୍ଜର ଶରୀର ହୋଇଛି

ଆଜି ତୁମରି ପ୍ରତିଟି ପାର୍ଶ୍ଵେ

ନିର୍ଜୀବ ଶିଳା ସତେ ଅବା

ଜୀବିତ ହୋଇ ତୁମରି ପ୍ରତିଟି ଅଂଗ

ସୁନ୍ଦର ସୁଶୋଭିତ କରି ତୋଳିଛି ।