ଜୀବନରେ କିଛି

 

ଜୀବନରେ କିଛି ଦୋଷ କରିଥିଲେ

       ଜାଣ ତ ଅଜାଣତରେ

କ୍ଷମିବ ହେ ପ୍ରଭୁ ନୀଳାଚଳ ନାଥ

       ଆଶ୍ରୟ ଦେବ ଅଚିରେ।

ପ୍ରାରବ୍ଧ ର କିଛି ଫଳ ବାକି ଥିଲେ

       ଭୁଞ୍ଜାଇବ ଏ ଜନମେ

ଜନ୍ମ ମୃତ୍ୟୁ ଚକ୍ରେ ଛନ୍ଦିବ ନାହିଁ ହେ

       ଜଗନ୍ନାଥ ସଦା ନମେ ।

ବାର୍ଦ୍ଧକ୍ୟ ର କଷ୍ଟ ଲାଘବ କରିବ

       ତୁମେ କୃଷ୍ଣ ତୁମେ ରାମ

ଦୁଃଖୀ ରଙ୍କି ସେବା କରିବାକୁ ମୋତେ

         ମାଗେ ଭିକ୍ଷା ପ୍ରତି ଦିନ।

ସବୁ ପୁଣ୍ୟ ଫଳ ଅର୍ପଣ କରୁଛି

         ନ ଚାହଇଁ ପ୍ରତିଦାନ

ତୁମେ ଥାଉଁ ଥାଉଁ ନ ଲୋଡ଼େ କାହାକୁ

         ତୁମେ ମୋ ହୃଦ ଚନ୍ଦନ।

ସ୍ୱାର୍ଥପର ଏହି ସଂସାର ଭିତରେ

        ତୁମେ ହିଁ ସତ୍ୟ ସୁନ୍ଦର

ତୁମରି ପ୍ରେମରେ ତୁମରି ସେବାରେ

         ବିତି ଯାଉ ମୋ ଜୀବନ।