Library
ଜୀବନର ସଂଜ୍ଞା
ଜୀବନର ସଂଜ୍ଞା
ଜୀବନର ସଂଜ୍ଞା ଜାଣିଛ କି ବନ୍ଧୁ
ଦେଖିଛ କି ତା' ଠିକଣା ?
ସୁଖ ତ ସୀମିତ ,ଦୁଃଖ ଅପ୍ରମିତ
ଫର୍ଦ୍ଦ ଫର୍ଦ୍ଦ ପ୍ରତାରଣା !!
ଜଘନ୍ୟ ଜହ୍ଲାଦେ କରିଥିବ ତୁମେ
ଅମିତ୍ରାକ୍ଷରୀ ମିତ୍ରତା !
ମିତ୍ରାକ୍ଷରୀ ମିତ୍ର ଦୁର୍ଲଭ ଜଗତେ
ସର୍ବତ୍ର ପକ୍ଷପାତିତା !!
ଜୀବନକୁ କେବେ ପରଖି ଦେଖିଛ ?
ମିଛ ମରୁ ବାଲିପଠା !
କଣ୍ଟକିତ ପଥେ ଉତ୍ଥାନପତନେ
ଧୂଳିଝଡ଼ ମୁଠା ମୁଠା !!
ଜୀବନ ଜାତକ ପଢିଛ କି ବନ୍ଧୁ
ଦେଖିଛ ତା' ମୁଖବନ୍ଧ ?
ପ୍ରଥମ ଅକ୍ଷରୁ କ୍ଷରି କ୍ଷରି ଯାଏ
ଜାତକର ମାନଦଣ୍ଡ !!
ଜ୍ୟୋତିଷଶାସ୍ତ୍ର ବି ଜଘନ୍ୟ ଜହ୍ଲାଦ
ନିଷ୍ଠୁର ନିମ୍ନ ବିଚାର ।
ଶାସ୍ତ୍ରମୁଖା ପିନ୍ଧି ନୀତି ବିରୁଦ୍ଧରେ
ଅଧର୍ମ କରେ ପ୍ରଚାର !!
ନୀତି , ନ୍ୟାୟ ,ଧର୍ମ ଲୁପ୍ତପ୍ରାୟ ଆଜି
ନାହିଁ ବେଦ ପରମ୍ପରା ।
କେତେକ ଚରିତ୍ର ଜ୍ୟୋତିଷଶାସ୍ତ୍ରକୁ
କରୁଛନ୍ତି ଦିଗହରା !!
ବାସ୍ତୁଶାସ୍ତ୍ର ଅବା ଜ୍ୟୋତିଷଶାସ୍ତ୍ରରେ
ଶାସ୍ତ୍ରାଭିଷିକ୍ତ ସଂସ୍କୃତି !
ଏବେ ବି ରହିଛି, ରହି ଚାଲିଥିବ
ପାରମ୍ପରିକ ପଦ୍ଧତି !!
କୁଶାସ୍ତ୍ରରେ ଥିବା କଳୁଷିତ ଦ୍ରୁମ
ଦେବ କି ଅମୃତ ଫଳ ?
ଯାହାକୁ କହୁଛ ଧର୍ମବୃକ୍ଷ ବୋଲି
ତା' ଫଳ ଦିଏ ଗରଳ !!
ସ୍ୱର୍ଗ ବି ଜୀବନ,ନର୍କ ବି ଜୀବନ
ଜୀବନ କ୍ଷୁଦ୍ର ନାଟିକା !
ଦୃଶ୍ୟ ପରେ ଦୃଶ୍ୟ ସଜେଇ ଜାଣିଲେ
ବିଳମ୍ବିତ ଯବନିକା !!
ଯବନିକା ଭୟେ ଶେଷ ଦୃଶ୍ୟ ଭାବି
କର୍ତ୍ତବ୍ୟ ଯିବା କି ଭୁଲି ?
ଅତୀତ ପୃଷ୍ଠା ହିଁ ବର୍ତ୍ତମାନ ବକ୍ଷେ
ରଟେ ସ୍ମୃତି-ହୁଳହୁଳି !!
ଯବନିକା ଆଗୁ ବିଭୀଷିକା ଆସେ
ଅଙ୍କରେ କଳଙ୍କ ହେଲେ !
କଳଙ୍କର ରଙ୍ଗ କିଏ ବା କହିବ
ପ୍ରାଣ ପାଖୁଡା ମଉଳେ !!
ଜୀଇଁ ଜାଣିଥିଲେ ଜୀବନ ସୁନ୍ଦର
ଜାଣିଲେ ହସ ମଧୁର !
ମିଷ୍ଟଭାଷୀ ଓଠ ମଧୁ ମନ୍ଦାକିନୀ
ନୋହିଲେ ତୁଚ୍ଛା ଜହର !!
ଦୂର ପାହାଡ଼ ତ ସର୍ବଦା ସୁନ୍ଦର
ନିଜେ ହୁଅ ସଦାଚାରୀ !
ଜୀବନର ସଂଜ୍ଞା ବୁଝିଯିବ ବନ୍ଧୁ
ମିଳିବ ଶ୍ରଦ୍ଧା ସବୁରି !!
