ଲାଇବ୍ରେରୀ
ପ୍ରୋଫାଇଲ୍
ଜୀବନ ସଙ୍ଘର୍ଷ
ଜୀବନ ସଙ୍ଘର୍ଷ
ଜୀବନ ଟା ଏଠି ଅଙ୍କା ବଙ୍କା ରାସ୍ତା
ଜନମୁ ମରଣ ଯାଏ
ଝଡ଼ ଝଞ୍ଜା କେତେ ଆସଇ ଜୀବନେ
ସହିବାକୁ ସବୁ ହୁଏ ll1ll
ମାନବ ଯେ ବେଳେ ନିଜ ସ୍ୱାର୍ଥ ଲାଗି
ପ୍ରକୃତି କୁ ଦଗା ଦିଏ
ପ୍ରକୃତିର କ୍ରୋଧ ତାଣ୍ଡବ ରଚଇ
ଭୋଗିବାକୁ ତାହା ହୁଏ ll2ll
ଅଦୃଶ୍ୟ ଶକତି ପ୍ରକୃତି ବିପତ୍ତି
ଜୀବନେ ଅନେକ ଆସେ
ତଥାପି ଏ ଜାତି ଭାଙ୍ଗି ପଡେ ନାହିଁ
ସଂଘର୍ଷ ରେ ବଞ୍ଚି ହସେ ll3ll
ଘାତ ପ୍ରତିଘାତ ଅନେକ ଯନ୍ତ୍ରଣା
ଏ ଜୀବନ କାଳ ପଥେ
ବଦଳାଇ ଦିଏ ଜୀବନ ଚର୍ଯ୍ୟାକୁ
ଯିବାକୁ ହୁଏ ତା ସାଥେ ll4ll
ଅନେକ ବିପତି ବନ୍ୟା ବାତ୍ୟା ଗତି
ଛାତିକୁ ଥରାଇ ଥାଏ
ଅକାଳେ ଜୀବନ ଝଡ଼ିପଡ଼େ କେତେ
ମନରେ ଯାତନା ଦିଏ ll5ll
ମନକୁ ସୁଦୃଢ କରିବାକୁ ହେବ
ବିପଦେ ଭୟ ନ କରି
ସବୁ ପରିସ୍ଥିତି ସାମନା କରିବା
ମୃତ୍ୟୁ କୁ କେବେ ନ ଡରି ll6ll
ମୃତ୍ୟୁ ପରେ ନବ ଜନମ ହୋଇବ
ସେ ପାଇଁ ଡରି ନ ଯାଇ
ଜନମ ମରଣ ଲାଗିଛି ସଂସାରେ
ବିଧାତାର ଖେଳ ଏଇ ll7ll
ପ୍ରତି ପାଦେ ପାଦେ ବିପଦ ରହୁଛି
ସେ ପାଇଁ ସଜାଗ ହେବା
ଇଶ୍ୱରଙ୍କ ଠାରେ ସବୁ ସମରପି
ସତ ପଥେ ଚାଲୁଥିବା ll8ll
କଣ୍ଟକିତ ପଥ ପୁଷ୍ପିତ ହେଇବ
କରୁଣା ବଳେ ତାଙ୍କରି
ଦୃଢ଼ ବିଶ୍ୱାସରେ ଭାବରେ ଡାକିଲେ
କୋଳେଇ ନେବେ ଶ୍ରୀହରି ll9ll
