ଜୀବନ ସାଥୀ
ଜୀବନ ସାଥୀ
ମୁଁ ନୀଳ ଚନ୍ଦ୍ରମା ନୀଳ ସରୋବରେ
ଦେଖୁଛି ମୁଁ ନିଜ ଛାଇ
ତୁ ଯେ ନୀଳକଇଁ ଖୁସି ମନ ହୋଇ
ରହିଛୁ ମୋ ଦିଗେ ଚାହିଁ I
ମନତଳେ ତୋର ପ୍ରେମର ତରଙ୍ଗ
ଛୁଇଁଗଲେ ମୋର ମନ
ତୋ ଆକାଶେ ଉଏଁ ନୀରବରେ ମୁଁ
ହୋଇ ଏକ ନୀଳ ଜହ୍ନ I
ତୋପାଇଁ ଲୋ ସଖୀ ଜୀବନ ସୁନ୍ଦର
ପାଖରେ ଯେବେ ତୁ ଥାଉ
ଦୁନିଆଯାକର ଝଡ ଝଞ୍ଜା ସହି
ପ୍ରେମ ନାବ ବାହିନେଉ I
ବୟସର ଭାର ଦେହକୁ ଛୁଇଁଛି
ମନକୁ ପାରିନି ଛୁଇଁ
ତୋପାଇଁ ଲୋ ସଖୀ ସ୍ୱର୍ଗପରି ଲାଗେ
ମୋତେ ଏ ମରତ ଭୂଇଁ I
ଅବଗାହି ତୋର ପ୍ରୀତି ସରୋବରେ
ସଜଳ ମୋ ଦେହ ମନ
ଅନନ୍ୟା ରୂପସୀ ରୂପବତୀ ତୁ ଲୋ
ଜୀବନ କରିଛୁ ଧନ୍ୟ I
ମୋ ହାତରେ ତୋର ହାତକୁ ଲୋ ସଖୀ
ସମୟ ଦେଇଛି ବାନ୍ଧି
ଚାଲିବି ତୋ ସହ ସାରା ଜୀବନ ମୁଁ
ପାଦରେ ପାଦକୁ ଛନ୍ଦି I