ଜୀବନ ସାଥୀ

ସେହି ମଣିଷ

ଆମ ଘରକୁ

ଅତିଥି ହୋଇ ଆସିଥିଲେ

ଅଗରୁ କେବେ

ଦେଖି ନ ଥିଲି,

ଜାଣି ବି ନ ଥିଲି ।

ବାପାଙ୍କ ଆଦେଶ କ୍ରମେ

ତାଙ୍କ ସାମ୍ନାରେ

ଠିଆ ହେଲି,

କଣେଇ ଚାହିଁଲି

ଚା କପ୍ ଟିଏ

ବଢ଼େଇ ଦେଲି,

ହେଲେ

ଭଲକରି ଦେଖି ପାରିଲିନି

ପଚାରି ଥିଲେ

ଉତ୍ତର ଦେଇଥିଲି ।

ପରିବାର ଠାରୁ

ଶୁଣି ଥିଲି ତାଙ୍କର 

କିଛି ଭଲ ଗୁଣ,

ସେ ସବୁ ସତ୍ୟତାର

ନ ଥିଲା ପ୍ରମାଣ ।

ସମୟ ଚକ୍ରରେ

କେଇ ଦିନ

କେମିତି ବିତିଗଲା ଯେ

ଜଣା ପଡିଲାନି,

ମନ ଭିତରେ

ଉଙ୍କି ମାରିଥିବା

କିଛି ପ୍ରଶ୍ନର 

ଉତ୍ତର ପାଇଲିନି ।

ବାପା ଘର 

ଏରୁଣ୍ଡି ଡେଇଁ

ଆଉ ଏକ ପରିବାରରେ

ଛନ୍ଦି ହୋଇ ଗଲି,

ଅଜଣା ଅଚିହ୍ନା

ମଣିଷଟିକୁ

ଜୀବନସାଥୀ କରିଦେଲି ।