ଜୀବନ ଓ ମୃତ୍ୟୁ

ଜୀବନ ଯେଉଁଠି ମୃତ୍ୟୁ ବି ସେଇଠି 

ନିୟତିର ଅପେକ୍ଷାରେ 

ହାଲୁକା ଯେଉଁଠି ଜୀବନର ବୋଝ 

ସକାଳର ସମୀକ୍ଷାରେ 

ନିଶବ୍ଦ ନିଶାର୍ଦ୍ଧ ଦଇବର ପରୀକ୍ଷା 

ନିବୃତିର ଅପେକ୍ଷାରେ 

ଜୀବନ ଯେଉଁଠି ମୃତ୍ୟୁ ବି ସେଇଠି 

ବର୍ଣ୍ଣହୀନ ବର୍ଣ୍ଣବୋଧ 

କୋକିଳର କଣ୍ଠେ ସାଜେ ସ୍ୱାଗତିକା 

ଦୂରୀଭୂତ ଅବସାଦ 

ଆହୁତି ଯେଉଁଠି ଯନ୍ତ୍ରଣାର କଣ୍ଠରୋଧ 

ଅଲୋଡ଼ା ଯଜ୍ଞ ଅଶ୍ଵମେଧ 

ଜୀବନ ଯେଉଁଠି ମୃତ୍ୟୁ ବି ସେଇଠି 

ଅସ୍ତିତ୍ୱର ଉପହାସ 

ଇତିହୀନ ଇତିହାସେ ନୂଆ ଅର୍ଥନୀତି 

ରାମରାଜ୍ୟ ଅବଶୋଷ 

ନର୍କ ନିର୍ମାଲ୍ୟର ଠିକଣା ମେଣ୍ଟାଏ 

ମୋକ୍ଷର ପ୍ରତ୍ୟାଶା ଶୋଷ 

ଜୀବନ ଯେଉଁଠି ମୃତ୍ୟୁ ତ ସେଇଠି 

ଦୁଃଖର ହୁଏ ବିନାଶ 

ସକଳ ଯନ୍ତ୍ରଣା ଦଗ୍ଧ ବାତାୟନେ 

ବିଛିର୍ଣ୍ଣ ନାଗଫାଶ 

ଜୀବନ ଜତୁଗୃହେ ମୃତ୍ୟୁ ବାସ୍ତବତା 

ଅଧାଜଳା ଇତିହାସ l