ଜୀବନ ଝରଣା ---------
ଜୀବନ ଝରଣା ---------
ଜୀବନ ଝରଣା
ଜୀବନ ବୁଝେନା
ମରଣର ମାନେ
ଆଲୋକ ଜାଣେନା ଅନ୍ଧକାର
ସପନ ବୁଝେନା
ନିରାଶାର ଭାଷା
ସେନେହ ଜାଣେନା ଅନାଦର
ରାଗ ଆଉ ରୋଷ
ଧରଣୀ ଜାଣେନା
କୁସୁମ ବୁଝେନା କଠୋରତା
ଭକତି ଜାଣେନା
ଗର୍ବ, ଅହଙ୍କାର
ଧର୍ମାନ୍ଧତା ଆଉ ଆବିଳତା
ସଂକୀର୍ଣ୍ଣ ଭାବନା
ବୁଝେନା ସାଗର
ଆକାଶ ଜାଣେନା ସସୀମତା
ପ୍ରେମ ବୁଝେନାହିଁ
ପ୍ରତାରଣା ମାନେ
ସିକତା ଜାଣେନା ବନ୍ଧୁରତା
ବସନ୍ତ ବୁଝେନା
ଶୁଷ୍କ ନୀରସତା
ଜ୍ଞାନ ତ ବୁଝେନା ଅଜ୍ଞାନତା
କୁଳୁକୁଳୁ ନାଦେ
ନିର୍ଝରଣୀ ଝରେ
ଜାଣେନାହିଁ ସିଏ ଶିଥିଳତା
ହେ ମାନବ! ତୁମେ
ଜୀବନ, ଆଲୋକ,
ଆଶା ସେନେହର ପ୍ରେମଝର
ଅନନ୍ତ ଆକାଶ
ଗଭୀର ସାଗର
ସହନଶୀଳତା ପୃଥିବୀର
ଦିବ୍ୟ ଆଲୋକର
ଜ୍ଞାନାରୁଣ ତୁମେ
ଭକତି କୁସୁମ ପ୍ରଭୁଙ୍କର
ଆଶା ଡୋରେ ବାହ
ସପନ ନଉକା
ଛାର ମରଣକୁ କିବା ଡର