ଜୀବନ ଏକ ସଂଘର୍ଷ
ଜୀବନ ଏକ ସଂଘର୍ଷ
ଜନ୍ମଠାରୁ ମୃତ୍ୟୁ ସଂଘର୍ଷର ଋତୁ
ନାଆଁଟି ତା'ର ଜୀବନ
ଜୀବନ ଜିଇବା ପାଇଁକି ଜରୁରୀ
ସଂଘର୍ଷ ହିଁ ପ୍ରତିକ୍ଷଣ ॥
ଛୋଟ ଠାରୁ ବଡ କେହି ନୁହେଁ ଛାଡ
ସର୍ବେ ତା ପାଇଁ ସମାନ
କଷ୍ଟ ନକରିଲେ ମିଳନ୍ତିନି କୃଷ୍ଣ
ରହିଛି ଏହି ଆଖ୍ୟାନ ॥
ନ କାନ୍ଦିଲେ ଛୁଆ ଆସେ ନାହିଁ ମାଆ
ପିଆଇବା ପାଇଁ କ୍ଷୀର
କରମ ନକରି ଭାଗ୍ୟକୁ ନିନ୍ଦିଲେ
ନାହିଁ କିଛି ପ୍ରତିକାର ॥
ବିନା ସଂଘର୍ଷ ରେ ମିଳିଯାଏ ଯାହା
ମାଗଣାରେ ଯାଏ ଗଣା
ମାଗଣାରେ ମଜା ମିଳେ ନାହିଁ କେବେ
ଏ କଥା ସଭିଙ୍କୁ ଜଣା ॥
ଚାଲି ଚାଲି ଗୋଡ ଥକିନି ଯାହାର
ପାଦେ ହୋଇନି ଫୋଟକା
ଲକ୍ଷ୍ୟସ୍ଥଳେ ପହଞ୍ଚିବ ସେ କିପରି
ନଭୁଞ୍ଜି କଷଣ ଧୋକା ॥
ପଶୁ ପକ୍ଷୀ କୀଟ ପତଙ୍ଗ ପର୍ଯ୍ୟନ୍ତ
ସରବେ ସଂଘର୍ଷେ ରତ
ବିନା ସଂଘର୍ଷରେ ସମ୍ଭବ ନୁହଁଇ
ଚାଲିବା ଜୀବନ ପଥ ॥