🌸ଝୁରୁଛି ଯମୁନା ଝୁରେ କଦମ୍ବ 🌸

ଫଗୁଣ ଆସିଛି ଗୋପ ଗାଁ ଦାଣ୍ଡେ 

ଝୁରୁଛି ଯମୁନା ଝୁରେ କଦମ୍ବ  

ରଙ୍ଗ ଖେଳିବାକୁ କହ୍ନେଇ ତ ନାହିଁ 

ଫିକା ଫିକା ଲାଗେ ଅବିର ରଙ୍ଗ  

ଯଶୋମତୀ ମା ଲବଣୀ ସାଇତି 

ଚନ୍ଦ୍ରିକା ଜୋଚ୍ଛନା ଧାରେ  

ଆଖି ନୀଳକଇଁ ପଡିଛି ଘୁମାଇ 

ହୃଦୟ କାହ୍ନୁକୁ ଝୁରେ  

ବଉଳା ଗାଇଟା ବାଟ ଭୁଲିଯାଏ 

ହମା ହମା ଡାକ ଦିଏ  

ସୁଦାମା ସୁବଳ ହାତେ କେନ୍ଦୁବାଡ଼ି ତୋର କଥା ଭାବୁଥାଏ  

ଛନ୍ଦେ ଛନ୍ଦ ତୋଳି ରାଧିକା ସୁନ୍ଦରୀ 

ପାଉଁଜି ତୋଳୁନି ସ୍ୱର  

ପ୍ରୀତି ଛିଟଫୁଲ ଆଞ୍ଜୁଳାରେ ଭରି 

ଧାଉଁନି ସେ କୁଞ୍ଜବନ  

ମନ ଉପବନେ ଝାଞ୍ଜି ବଇଶାଖୀ 

ନିଃସଙ୍ଗ ହୃଦୟ ତଳେ  

ତୋ ପ୍ରଣୟ ଗୀତି କାନରେ ଶୁଭଇ 

ରାଧା ସ୍ମୃତିର ନିଆଁରେ ଜଳେ  

ତୃଷାତୁର ଆଖି ତୋତେ ଖୋଜୁଅଛି 

ଅସରନ୍ତି ଦୁଃଖ ମନେ  

ନୀରବେ ବିରହୀ ରାଗିଣୀ ତୋଳୁଛି 

ଯାଉନାହିଁ କୁଞ୍ଜ ବନେ  

ଲଳିତା ବିଶାଖା ଅଷ୍ଟସଖୀ ଗଣ 

ପ୍ରୀତି ଭରା ଅନ୍ତରରେ  

ଖୋଜନ୍ତି ରସିକ ନାଗର ପୁଙ୍ଗବ 

ପ୍ରତାରିତା ହେବା ପରେ  

ତୁମେ ଦେଖାଇଲ ମୁଠା ମୁଠା ସ୍ୱପ୍ନ 

ମଧୁମାସେ ରଙ୍ଗ ବୋଳି  

ବୃଷଭାନୁ ଜେମା ତନୁ ଅଗଣାରେ 

ମାରି ପ୍ରୀତି ପିଚକାରୀ  

ହେ ନଟ ନାଗର ପ୍ରେମିକ ପ୍ରବର 

ଚନ୍ଦ୍ରାବଳୀ ପୂର ଶୂନ୍ୟ  

ମୋହନ ମୁରଲୀ ବାଜୁ ନାହିଁ ଆଉ 

ଚୁନା ହୁଏ ରାଧା ମନ  

ନୀଳମେଘୀ ପାଟ ଉଈ ଲାଗିଲାଣି 

ପିନ୍ଧୁ ନାହିଁ ରାଧାରାଣୀ  

ଭିଜୁନି ମଳୟ ପରଷରେ ଗୋପ 

ପିକ ଗାଉନି ମଧୁ ରାଗିଣୀ  

ପ୍ରେମ ପ୍ରଣୟର ଅର୍ଘ୍ୟଥାଳି ଧରି 

ରାତି ରାତି ଉଜାଗରେ  

ନୀଳନୟନାର ଆଖିର କଜ୍ଵଳ 

ଝରିଯାଏ ଲୋତକରେ  

ବିଶ୍ୱାସର ନଈ ବାନ୍ଧି ହୁଏ ନାହିଁ 

ଶୁଖିଯାଏ ଧୀରେ ଧୀରେ  

ଶ୍ୟାମ ବାଟ ଚାହିଁ ବସିଅଛି ରାଇ 

ଯମୁନା ନଦୀର ତୀରେ  

ଫୁଟୁନି କଦମ୍ବ ଗାଉନି ଶ୍ରାବଣ 

ରିମ୍ ଝିମ୍ ଶବଦରେ  

ଭିଜୁନାହିଁ ରାଈ ମଧୁକୁଞ୍ଜ ବନେ 

ବରଷାରେ ଜହ୍ନ ରାତିରେ  

ଚୋରା ଚଇତିର ଫୁଲେଇ ପବନ 

ରଧାକୁ ପାରୁନି ଛୁଇଁ  

ମେଘ ସବାରୀରେ ଜହ୍ନର ଜୋଚ୍ଛନା 

ରାଧାକୁଞ୍ଜେ ଆସୁନାହିଁ  

ହୋଇଛି ବାୟାଣୀ ଗୋପପୁର ରାଣୀ 

ଶ୍ୟାମଘନ ତୁମ ରାଈ  

ଫେରିବାକୁ ତୁମେ କଣ୍ଟ ଦେଇଥିଲ 

ସେକଥା କି ମନେ ନାହିଁ  

ଉଜାଣି ଯମୁନା କ୍ଷୀଣ ତନୁ ହେଲା 

ତୋତେ ଝୁରି ଝୁରି କାହ୍ନା  

ଷୋହଳ ସହସ୍ର ଗୋପ ଗଉଡ଼ୁଣୀ 

ତୋ ବିରହେ ପ୍ରୀତି ଶୂନ୍ୟା  

ତୁ ଥିଲୁ ଜୀବନ ବଞ୍ଚିବାର ରାହା 

ଆଶା ମନ୍ଦାକିନୀ ଧାର 

ମନ ଯଜ୍ଞଶାଳା ଶେଷ ଆହୁତିରେ 

କରି ଦେଲୁ ସାତପର  

ପାଷାଣ ହୋଇଲୁ ପଥର ଦେଉଳେ 

ଭୁଲିଗଲୁ ବୃନ୍ଦାବନ  

ଥରଟେ ଦେଖିଯା କେମିତି ଅଛନ୍ତି 

ଗୋପ ବୃନ୍ଦାବନ ଜନ  

ଝରାଫୁଲ ପରି ଝରି ପଡିଛନ୍ତି 

କଳାବାଦଲର ଛାଇ  

ଢାଙ୍କିହୋଇଅଛି ଗୋପ ଆକାଶରେ 

ପାରୁଛୁ କେମିତି ରହି  

ପ୍ରିୟତମା ରାଧା ଝୁମା ଆଖିପତା 

ସପନ ରହିଲା ଅଧା  

ତୁଳୀତଳ୍ପ ଶଯ୍ୟା ନରମ ବିଛଣା 

ଶୋଉନାହିଁ ଆଉ ରାଧା  

ହେ ମନ ମୋହନ ରାଧା ପ୍ରାଣ ଧନ 

ଦିଅ ନାହିଁ ଆଉ ଅନ୍ତର୍ବେଦନl  

ଯୁଗଳ ମୂରତି ଦେଖିବେ କୁଞ୍ଜରେ 

ଝୁରୁଛି କଦମ୍ବ ଝୁରେ ଯମୁନା