ଝୁରୁଛି ବକୁଳବନ
ଝୁରୁଛି ବକୁଳବନ
ନୀଳାଚଳ ଉଭା ଦାରୁ ମୂର୍ତ୍ତିବିଭା
ଉତ୍କଳର ଶ୍ରେଷ୍ଠ ମଣି
ଭାର୍ଗବୀର ତୀରେ ସୁଆଣ୍ଡୋ ଷଠିରେ
ଉତ୍କଳୀୟ ସେବା ମଣି ।
ଅଛି କା'ର ସାଧ୍ୟ କରିବାକୁ ତୁମ୍ଭ
ସେବାର ବିବିଧ ବର୍ଣ୍ଣ
ଉତ୍ସର୍ଗୀକୃତ ଯେ' ନବକଳେବର
ସାରା ଉତ୍କଳ ଭୁବନ ।
ସ୍ବଦେଶ ପ୍ରେମରେ ଧ୍ୟାୟୀ ଅନୁକ୍ଷଣ
ଅସ୍ପୃଶ୍ୟେ କରିଣ ସେବା
ଧନ୍ୟ ସେ ପରାଣ ଆହେ ପୂଣ୍ୟପ୍ରାଣ
ସୁଆଣ୍ଡୋ ଭୂଇଁରେ ଉଭା ।
ସେବାମନ୍ତ୍ରେ ସ୍ନିଗ୍ଧ 'ସମାଜ'ର ସୌଧ
ହାତ ତିଆରି ସୃଜନ
ତୁଚ୍ଛରେ ଆତ୍ମଜ ଜନତାରେ ହେଜ
ନିଆରା ଶୁଦ୍ଧ ପରାଣ ।
ଆସନ୍ତ କି ଫେରି ଉଡ଼୍ରେ ଅବତରି
ହୁଅନ୍ତା ସେବା ବିନ୍ୟାସ
କୁସଂସ୍କାର ପରେ ସ୍ୱର୍ଗୀୟ ଗୁଣର
କରିଦ୍ୟନ୍ତ ଶିଳାନ୍ୟାସ ।
ହେ ସର୍ବ ବରେଣ୍ୟ ତୁମ୍ଭ ସାଧୁପଣ
ଧାତ୍ରୀ ଭାର୍ଗବୀ ଜୀବନ
ସାକ୍ଷୀ ସତ୍ୟବାଦୀ ଉତ୍କଳ ଚୌହଦୀ
ଝୁରୁଛି ବକୁଳବନ ।