ଝିଅଟିଏ ମୋତେ କରହେ ଠାକୁରେ

ଝିଅ ଟିଏ ମୋତେ କରହେ ଠାକୁରେ

ପିତାମାତାଙ୍କର କୋଳେ

ଶିକ୍ଷା ଲାଭ କରି ସେଵା ବ୍ରତ ଧରି

ବଡ଼ ହେବି ଭୂମଣ୍ଡଳେ ll

କ୍ରୀଡ଼ା କୌତୁକରେ ଚିକିତ୍ସା ବିଜ୍ଞାନେ

ସୁନାମ ଅର୍ଜିବି ମୁହିଁ

ଅସ୍ତ୍ର ଧରି ହାତେ ଯୁଝିବି ଅଇରୀ

ଯେତେବା କଷଣ ସହି ll

ଝିଅ ଟିଏ ମୋତେ କରହେ ଠାକୁରେ

ଗଢିବି ସଂସାର ନୂଆ

ମାଆ ଟିଏ ହୋଇ ସନ୍ତାନକୁ ଦେଵି

ପ୍ରଥମ ଶିକ୍ଷାର ଛୁଆଁ ll

ଜ୍ଞାନ ଆଲୋକରେ ହେଇ ଉଦ୍ଭାସିତ

ଜଗତେ ହେବ ସେ ବଡ଼

ନଥିବ ଯେଉଁଠି ଅଜ୍ଞାନ ଅନ୍ଧାର

ଅବା କୁସଂସ୍କାର ଝଡ଼ ll

ଭଗିନୀଟେ ମୋତେ କରହେ ଠାକୁରେ

ଭାଇ ପାଇଁ ହେବି ରାହା

ବିପଦେ ଆପଦେ ଅବା ଦୁର୍ଦ୍ଦିନରେ

ନିଶ୍ଚେ ହେବି ତାକୁ ସାହା ll

ସତ୍ୟପଥେ ତାକୁ ଚଲାଇ ନେବି ମୁଁ

ରଖି ନିଶା ଠାରୁ ଦୂରେ

ହିଂସା ରକ୍ତପାତ ପାଇଁ ପ୍ରତିବାଦ

କରିବି ମୁଁ ଦୃଢ଼ ସ୍ଵରେ ll

ଝିଅ ଟିଏ ମୋତେ କରହେ ଠାକୁରେ

ଲଢ଼ିବି ମୁଁ ନ୍ୟାୟ ପାଇଁ

ଯେତେ ଝଡ଼ ଝଞ୍ଜା ଆସିଲେ ଜୀବନେ

ପଛ ଘୁଞ୍ଚା ଦେଵି ନାହିଁ ll

ପୁରୁଷ ପ୍ରାଧାନ୍ୟ ସମାଜରେ ମୁହିଁ

ସରଜିବି ଉଚ୍ଚ ସ୍ଥାନ

ଅବଳା ଦୁର୍ବଳା ନଭାବିବେ କେହି

ନକରିବେ ଅସମ୍ମାନ ll

ଏତିକି ମିନତୀ ପାଦ ପଦ୍ମେ ମତି

ରଖୁଛି ଠାକୁରେ ତଵ

ହାତ ଖୋଲି ବାରେ ଦିଅହେ ଆଶିଷ

ମନୋବାଞ୍ଛା ପୂରିଯିବ ll