ଝିଅ ଆମ ଅମୂଲ୍ୟ ରତନ

ଝିଅଟିଏ ବୋଲି ଅନାଦର କରୁ

  ନୁହେଁ କି ତୋର ସନ୍ତାନ  

ସେନେହ ଶରଧା ପାଇବାକୁ ଟିକେ

  ବ୍ୟାକୁଳିତ ତା'ର ମନ l ୧

ଗାଳି ଶୁଣୁ ଅଛି ମାଡ଼ ଖାଉଅଛି

  ମାଜେ ଅଇଁଠା ବାସନ  

ଠେଲି ଦେଲୁ ତୁହି ମରଣ ମୁହଁକୁ

  ହେବା ପାଇଁ ହିନିମାନ l ୨

ପଢ଼ିବା ଖେଳିବା ସମୟରେ ତା'ର

  କରାଉ ଶିଶୁ ଶ୍ରମିକ  

ପର ଘର ଠାରେ ପାଇଟି କରାଉ         

  ତୋର ଜୀବନକୁ ଧିକ । ୩

ପଶୁ ଠାରୁ ତୁହି ହୀନ ହୋଇ ଗଲୁ

  ନାହିଁ ତୋର ମାନବିକ  

କେଇ ଟଙ୍କା ପାଇଁ ବିକି ଦେଉ ଅଛୁ

  ନିଜ ଛୁଆଟିକୁ ଦେଖ l ୪

କ°ସେଇ ହାତରେ ଛେଳି କୁକୁଡ଼ାର 

  ଉନ୍ନତି ହେବକି ଭାଇ  

କେତେ ସୁରକ୍ଷିତ ଝିଅଟି ତୋହର

  ଦଲାଲ ସାଥିରେ ଥାଇ l ୫

ଝିଅମାନେ ଆଜି ପାଠ ପଢ଼ି କେତେ

  କରନ୍ତି ଦେଶର କାମ  

କଳ୍ପନା ଚାୱଲା ମହାକାଶ ଯାଇ

  ରଖିଲା ଦେଶର ନାମ l ୬

ପି.ଟି. ଉଷା ଯେ ଦଉଡ଼ର ରାଣୀ

  ବୋଲାଏ ଜଗତ ଯାକ  

ନନ୍ଦିନୀ ଶତପଥୀ ମୁଖ୍ୟ ମନ୍ତ୍ରୀହୋଇ

  ରଖିଲା ଉତ୍କଳ ଟେକ l ୭

ଶିକ୍ଷିତା ଯୋଗୁଁ ହେ ଇନ୍ଦିରା ଗାନ୍ଧୀ ଯେ

  ଦେଶର ପ୍ରଧାନ ମନ୍ତ୍ରୀ  

ଲୋକ ସେବାକରି ମଦର ଟେରେସା

  ହୋଇଲା ଦେଶର ଶିରୀ l ୮

ରାଜନୀତି ଠାରୁ ଧର୍ମ ନୀତି ଯାଏ

  ସବୁଠି ଝିଅର ସ୍ଥାନ 

ମୁଖାଗ୍ନି ଦେବାକୁ ସମାଜରେ ଆଜି

  ଝିଅ ପାଏ ସନମାନ l ୯

ଜିଲ୍ଲାପାଳ ଠାରୁ ରାଷ୍ଟ୍ରପତି ଯାଏ

  ଆମ ଝିଅ ଯୋଗ୍ୟା ହୁଏ  

ଦେଶ ରକ୍ଷା ପାଇଁ ହାତେ ଅସ୍ତ୍ର ଧରି

 ସେନା ନାୟକ ବୋଲାଏ l

ଝିଅକୁ ତୋହର ଘରେ ରଖ ନାହିଁ

  ଚୁଲି ଫୁଙ୍କିବାର ପାଇଁ  

ପଢ଼ାଇବା ପାଇଁ ଶପଥ କରତୁ

  ଏ ଦେଶର ମାଟି ଛୁଇଁ l ୧୧ 

ଘରକୋଣେ ବସି ଝିଅଟି ତୋହର

  ଆଖିରୁ ଝରାଏ ଲୁହ 

ତତେ ପଚାରୁଛି କାହିଁକି ହେ ବାପା

  ସ୍କୁଲ ନ ପଠାଇଲ କୁହ l ୧୨

ଅପାଠୁଆ ବୋଲି ଝିଅଟି ତୋହର

  ଶାଶୁଘରେ ପାଏ ଦୁଃଖ 

ହିସାବ କିତାବ ଜାଣି ନ ଥିବାରୁ

  ଲୋକେ ଠକୁଛନ୍ତି ଦେଖ l ୧୩ 

ବଦଳୁଛି ଯୁଗ ଆରେ ଭାଇ ଦେଖ

  ହୁଅ ନାହିଁ ନୀଚ୍ଚମନା  

ପୁଅ ଝିଅ ଆଜି ସଭିଏଁ ସମାନ

  ମଣିଷ ରୂପରେ ଗଣା l ୧୪ 

ପାଠ ପଢ଼ି ଝିଅ ଶିକ୍ଷିତା ହୋଇଲେ

  ସୁଖ ତୁ ପାଇବୁ ଭାଇ 

ସମାଜରେ ତୋତେ ମାନ ସନମାନ

  ମିଳିବ ଜାଣିଥା ତୁହି l ୧୫

ପାଠୋଇ ଝିଅର ବାପା ସେ ଅଟଇ

  ବୋଲିବେ ଜଗତ ଯାକ  

ପାଠୋଇ ଝିଅଟି ଘରେ ତୋରଥିଲେ

  ବଦଳି ଯିବ ତୋ ଭେକ l ୧୬

ଆଜି ତୋରଝିଅ କାଲି ତା'ର ବୋହୂ

  ପାଠ ପଢ଼ିଥିଲେ ଜାଣ 

ଶ୍ୱଶୁର ଘରରେ ଆଦର ପାଇବ

  ରହିବ ତୋ ଟେକ ପଣ l ୧୭

ଘଡ଼ିକି ଘଡ଼ିଏ ବଦଳୁଛି ନିତି

  ରାଇଜ ଯାକର କଥା  

ପଢ଼ି ଶୁଣାଇବ ଖବରକାଗଜ

  ସୁଦୂର ବନ୍ଧୁର ବାର୍ତ୍ତା l ୧୮

ମିଳିମିଶି ଆମେ ଗଢ଼ିବାରେ ଆସ

  ନୂତନ ଶିକ୍ଷା ସମାଜ 

ଯେଉଁ ଥିରେ ଭାଇ ନଥିବ ତିଳେହେଁ

  ପୁଅ ଝିଅ ଭେଦ ଭାବ l ୧୯

ପଢ଼ିବା ଖେଳିବା ସମୟଟି ତା'ର

  କାମ କରିବାକୁ ନୁହେଁ  

ଆଗେଇ ଆସହେ ପଢ଼ାଇବା ପାଇଁ

  ମା' ବାପା ମିଶି ଦୁହେଁ l