ଜଘନ୍ୟ ଷଡ଼ଯନ୍ତ୍ର

ତ୍ରିପୁର ବିଜୟୀ ବିଶ୍ରବା ତନୟୀ

 ସୁନାପୁର ଅଧିଶ୍ୱର

ଦେବ ନାଗ ନର ଗନ୍ଧର୍ବ କିନ୍ନର

 ତା ପ୍ରତାପେ ଥରହର |

ରାଣୀ ମନ୍ଦୋଦରୀ ଅନିନ୍ଦ୍ୟା ସୁନ୍ଦରୀ

 ଯାର ପ୍ରାଣ ପ୍ରଣୟିନୀ

ପ୍ରିୟତମା ପତ୍ନୀ ଅତି ଗୁଣବତୀ

 ରାଜ୍ଞ ମାନସ ମୋହିନୀ |

ବସାଇ ଅଙ୍କରେ ଦିନେ କୌତୁକରେ

 ପଚାରିଲା ଲଙ୍କେଶ୍ୱର 

ଲଙ୍କା କଟକର ସବୁଠୁଁ ସୁନ୍ଦର 

 କେ ଅଟେ ପୁରୁଷ ବର |

ହସି ମଲ୍ଲୀହାସୀ ବଚନ ପ୍ରକାଶି

 ଶୁଣ ଆହେ ପ୍ରାଣେଶ୍ୱର

ସବୁଠୁଁ ସୁନ୍ଦର ଶ୍ରେଷ୍ଠ ବୀରବର

  ବିଦ୍ୟୁତଜିହ୍ୱା ଦୈତ୍ୟ ବର |

ତୁମ୍ଭ ଭଗ୍ନୀପତି ରୂପେ ରତିପତି

  ପ୍ରିୟ ଜାମାତା ଆମ୍ଭର

ଶୁଣି ଏ ବଚନ ମରିଗଲା ମନ

  ନିଜକୁ ମଣେ ଇତର |

ଚିନ୍ତେ ବୈଶ୍ରବଣ ମୋର ପ୍ରିୟା ମନ

 ସୂର୍ପଣଖା ପତି ପ୍ରତି

ହୋଇବ ଆକୃଷ୍ଟ ହେଉ ଅଛି ଦୃଷ୍ଟ

 ସାଜିବ ଦିନେ ବିପତ୍ତି |

ବିଦ୍ୟତଜିହ୍ୱା କଣ୍ଟା କରିବାକୁ ସଫା

 ଷଡ଼ଯନ୍ତ୍ର ଅନୁକ୍ଷଣ 

ଶକ୍ତି ପରୀକ୍ଷଣ ପାଇଁ ରଣାଙ୍ଗନ

  କ୍ରୀଡା କଲା ଆୟୋଜନ |

ଜାମାତା ସହିତ ଲଢ଼ିବା ନିମିତ୍ତ

 କେହି ନୋହିଲେ ସମର୍ଥ

ଅତିକାୟ ସହ କୁମାର ଅକ୍ଷୟ

  ଇନ୍ଦ୍ରଜିତ ପରାହତ |

ନିଶ୍ଚେ ମନ୍ଦୋଦରୀ ଚିତ୍ତ ନେବ ହରି

 ଚିନ୍ତିଲା ତା ଦୁର୍ବଳତା

ସଭାରେ ଘୁମାଏ ଲକ୍ଷ୍ୟ କରି ରାୟେ

 ମନେ ଲଭି ପ୍ରସନ୍ନତା |

ଡାକି ରାଜସଭା ଅସୁର ମଘବା

  ଜଣାଇଲା ଵିଜ୍ଞାପନ

ସଭାରେ ଘୁମାଇ ମାରିଲେ ବା ହାଇ

  ମସ୍ତକ ହେବ କର୍ତ୍ତନ |

ଷଡ଼ମାସ ଭୋଗ ମିଳିଲା ସୁଯୋଗ

  ବିଦ୍ୟୁଜିହ୍ୱା ଘୁମାୟିତ 

ପେଷି ଚନ୍ଦ୍ରହାସ୍ୟ ଖଡ୍ଗ ଦଶଆସ୍ୟ

  ମଥା କାଟିଲା ତ୍ୱରିତ |

କ୍ରୁର ଷଡ଼ଯନ୍ତ୍ର ଆତ୍ମୀୟ ନିହତ

  ଭଗିନୀ ଭୋଗେ ବୈଧବ୍ୟ 

କ୍ରୋଧେ ସୂର୍ପଣଖା ପ୍ରତିଶୋଧେ ଦକ୍ଷା

  ରାମ ରାବଣ ଆହବ |

ଷଡ଼ଯନ୍ତ୍ର ଫଳ ଭୋଗେ ଲଙ୍କେଶ୍ୱର

  ବିଧବାଙ୍କ ଆର୍ତ୍ତ ସ୍ୱର

ଝଙ୍କୃତ ଗଗନ ସୂର୍ପ ହର୍ଷ ମନ

  ଶାସ୍ତି ଏ ଷଡ଼ଯନ୍ତ୍ରର |