ଜାତୀୟ ପତାକାର ବାର୍ତ୍ତା

ଭାରତ ମାତାର କୋଳେ

ଗାନ୍ଧୀ ସୁଭାଷଙ୍କ ବଳେ

ଉଡେ ଫରଫର ଜାତୀୟ ପତାକା

ନୀଳ ଗଗନର ତଳେ।

ତିନି ରଙ୍ଗ ଆମ ଧ୍ଵଜ

କେଶର ଧଳା ସବୁଜ

ମଝିରେ ନେଳିଆ ଅଶୋକ ଚକର

ହୋଇଅଛି ସଜବାଜ।

ଉପରେ କେଶର ରଙ୍ଗ

ସୂଚାଏ ବୀରତ୍ୱ ତ୍ୟାଗ

ମାଟି ମାଆ ପାଇଁ ଜୀବନକୁ ଦେଇ

ରଖିବା ସମ୍ମାନ ଆଗ।

ଧବଳ ରଙ୍ଗର କଥା 

ସତ୍ୟ ଶାନ୍ତି ପବିତ୍ରତା

ମନ ବଚନକୁ ଏକ କଲେ ସର୍ବେ

ବଢିବ ଦେଶ ଏକତା।

ସବୁଜ ରଙ୍ଗର ବାର୍ତ୍ତା

ଶ୍ରମ ସମୃଦ୍ଧିର ଗାଥା

ବିଶ୍ବାସ ବଳରେ କାମ କଲେ ଆମେ

ହୋଇବା ଜଗତଜିତା।

ଅଶୋକ ଚକର ନୀଳ

ଦିଶଇ କେଡେ ଡଉଲ

ନ୍ୟାୟ ଧର୍ମ ପଥେ ଆଗେଇ ଚାଲିଲେ

ଛୁଇଁବା ଶିଖର ସ୍ଥଳ।